Las qualques personas desplaçadas aqueste dimenge 12 de junh se son exprimidas e an exclús al primièr torn un molon de candidats que se reclaman del president Macron. Dins lo departament constituït de 9 circonscripcions, per lo second torn restan dos candidats presidencialista en cap de fila, dòna Cristol per la tresena circonscripcion e sénher Vignal per la novena circonscripcion. Se sap pas si son los afars de braguetas que foguèron fatal.
 
Per la rèstealo departament es partejat en dos tendéncias principals: d’un costat la NUPES (Nova Union Populara Ecologica e Sociala) que n’arriba primièra a l’entorn de Montpelhièr, Gange, Sant Martin de Londras... Alavetz al ponent del departament lo RN n’arriba primièr dins las circonscripcions de Bedarius-Capestanh e de Pesenàs-Seta. Sus la circonscripcion de Besièrs, dona Menard arriba en primièr, mai la NUPES es a qualques ponches e la partida finala serà dimenge 19.
 
Malgrat l’amassa, al primier torn, del molon de sensibilitats d’esquerra dins la NUPES, Erau foguèt un dels departament ont l’oposicions d’elegits PS foguèt mai fòrta. Del cònsol màger de Montpelhièr qu’èra contra, al cònsol màger de Pesenàs que disiá pas res o encara la nomenada «majoritat departamentala» (Mesquida) e regionala (Delga) que grumejava en contra aquela union, l’aigatge electoral o auriá tot aclarat.
 
E aicí al debut de la setmana, la presidenta de region auria apelat a votar pels candidats de senèstra.
 
Al contrari, lo president del departament Mesquida declarava dins Midi-Libre que son soten als candidats de senèstra dins Erau seriá a son léser segon las personas.
 
Dels cap d’aficha PS del departament ne rèsta res, e aquela estrategia d’engana n’a pas foncionat amb las personas que se son desplaçadas.
 
Mas la batèsta continha subretot dins lo Besierés ont la participacion foguèt la pus baissa amb lo 45%. Magalie Crozier, gardamalauts a l’espital public de Besièrs, continha jos lo drapèu NUPES contra la deputada sortenta Emmanuelle Menard.
 
Dins la tèrra de Mesquida, lo Recampament nacional arribèt en cap de las eleccions e s’afrontarà al cònsol màger de Cabestanh, Polard.
 
Ponch negre dins lo departament e dins tota Occitania e França: lo taus de participacion que s’amendrís en comparision a 2017. L’istòaria ditz pas se los franceses serián un pauc vaccinats amb una dòsi de bonapartisme qu’inspira las eleccions presidencials. Las eleccions legislativas son d’un biais la salvagarda jacobina del revolum de 1789 e de la primièra constitucion de l’an I. Nos caldrà recomençar lo trabalh?
 
Dins un primièr temps vos prepausi d’anar o votar, qu’es un pauc far la revoluccion, e çò que’n pensi, ieu.