Li a gaire, anavi crompar de vin ma damijana en man. Ara quasi pus degun serve de vin vengut drech de la tina sortit dau pistolet. Per espranhar quatre sòus, siam de monde per chausir lo “bag in box”, BiB en neo francés, qu’a remplaçat la damijana. Lo vin, en 3 o 5 litres, es mens carivent qu’aqueu vendut en botilha, per una qualitat equivalenta drech anar.
 
Lo BiB es un paralepipèda marcat dau nom dau tenament que l’a vendut. Mai recentament, mi siáu avisat que sus lei BiBs de domanis gaire luenh de ma bastida, era escrich pichinet pichinet “Vin de France- conditionné à la propriété” [vin de França, condicionat a la proprietat].
 
A Ròcabruna, mon vilatge, si diiá “Lo vin es medecin”, “cu a de pan e de vin, a pas besonh dei vesins”. Ara podriam apondre “Se vas crompar de vin, aguès l’uelh fin”. M’es arrivat mai d’un còup de mi faire colhonar en crompant 4 euros dau litre un vin de BiB que creiáu produch emb lo rasim dau vinhau de davans la cròta... vengut d’un autre luec de França o d’un autre país bessai.
 
Ara pitarai pas pus. Cercarai l’origina dau vin contengut sus lei quatre caires dei dichs BiBs. La manca de fisança entre aquelei que buvon lo vin e aquelei que lo vendon es anciana. Dins un temps, es agut arrivat que si faguesse de vin sensa rasim...