Diriáu pas que siáu un tifòs de l’OGC Niça, mai es pasmens l’equipa que prefèri d’aquelei de noastra riba de mar, entre l’O.M e l’AS Monègue. La mens rica dei tres.
 
Eri tancat davant ma tele l’autr’ièr per veire la finala de la Copa de França Nantes- Nice. L’OGC Niça avián ganhat lei quatre darniers rescòntres dau Campionat e mi pensavi que ganharián aquèu còup, estènt que Nantes faián gaire de belugas. Se n’era gaire mancat que davalesson l’an passat en segonda divisien. Mai Nantes son de la familha dei winners coma si ditz en neo francés. An sovènt un pichon quauquaren vengut dau cèu per leis ajudar.
 
Ailàs, a-n un momènt dins la surfàcia dicha de reparacien, la pauma a picat sus lo braç d’un defendeire niçard e l’arbitre a sublat un penalti (penalitat) que si justificava pas. L’asard solet aviá fach la pauma tocar aquèu malurós braç. Degun autre gòl siguet marcat de la partida.
 
L’arbitrage siguet fach a l’asard bautazar mai va fau pas dire estènt qu’era una frema qu’arbitrava. Aquelei que va dirián passarián per de falocratas, de machos e de misogines.
 
Niça an mancat de gaire la victòria au Campionat li a un parèu d’ans. L’autr’ièr son estats victimas d’un error d’arbitrage puei lo gardian nantés leis a privats d’un gòl d’un biais miraculós a la fin de la partida. Losers l’OGC Niça?