Lo dijòus 7 de julhet se daubriscoc a Tornahuelha (Gasconha tolosenca) un estanquet associatiu, aperat “guingueta” pr’amor que’s tròba au ras de l’aiga e que s’i pòt escotar musica e dançar cada ser, que son los elements indispensables per poder beneficiar d’aquesta apelacion.
 
Pequé parlar d’aquesta guingueta, lavetz que n’i a ara un pauc de pertot?
 
Pr’amor qu’es una iniciativa “ciutadana” sortida d’una estructura pro unenca per aquí que’s sona “l’Agòra”. Es la Comuna que decidiscoc, suu conselh deu delegat a la Democracia, Mathieu Bourgasser, d’amassar ciutadans tirats au sòrt per estar una fòrça de perpausicion de cap au conselh municipau. D’aquí neishoc una comission “guingueta”, puèi una associacion independenta segon la lei 1901 qu’entreprengoc d’apitar aqueste estanquet estivau.
 
Mantunas comunas hèn una crida aus privats per assegurar la venda de bevudas e minjar, quan sovent tanben l’endret es sancèrament privat. Aquí, non pas. Estoc demandat aus restaurators locaus de vénguer assegurar de ser la venda de mangiscla, mes son benevòles que’s seguissen darrèr lo taulèr per vénder de qué béver, mes tanben sietas de hromatges et carnsalada en jornada, tanvau glaças de fabricacion artisanala e locala.
 
Çò d’originau tanben es que lo programa de la jornada es daubèrt a las associacions de la vila que pòden exercir activitats de totas: descobèrta de la natura, leçons de bachata, talhèrs pedagogics suu climat, gimnastica volontària, talhèrs “Purmèrs Secors”, talhèr de decoracion de la guingueta peus dròlles, jòcs intergeneracionaus, lectura teatrala, Qi Gong, etc …
 
Trobaratz aquí lo programa deu mes de julhet, cada divendres, dissabte e dimenge, en tot saber qu’au mes d’agost la guingueta serà barrada: www.laguinguettedetournefeuille.org dambe un pichon mot de planvenguda en occitan.
 
Un exemple de vida en comun de seguir, solide …