Es atau que l’istòria es hèita: a cada còp qu’i a un eveniment, cadun i tròba una confirmacion de çò que pensava. Me brembi deus atemptats deu 11 de seteme a New-York, quan un predicador american i vesèva lo castig de Dius pr’amor de l’omosexualitat tròp liura aus USA (anecdòta vertadièra) lavetz qu’uns occitanistas eths, consideravan que lo país pagava son mesprés de cap a las minoritats culturalas dens lo monde.
 
Mes solide, son los qu’an lo poder que s’i escaden d’impausar lor vision. Es un pauc lo cas ara peu murtre òrre deu praube Samuel Patty.
 
Benlèu que los jornalistas vòlen utilizar frasas bracas per ganhar temps, mes presentan la victima coma “assassinat per aver hèit un cors sus la laïcitat”. Es pas vertadièrament exacte e i vesi una petita recuperacion que bota devath lo tapís los detalhs de l’ahar.
 
Samuel Patty èra un bon professor que hasèva plan son mestièr. Presentava son cors sus la laïcitat dempuèi unas annadas e pas nat problèma estoc pas jamès de notar, l’ensems de son ensenhats le consideravan coma un professor de qualitat, los pairs d’escolans tanben.
 
Hascoc doncas son cors coma de costuma, digoc a los que poderén estar butats per las caricaturas de las qualas parlava (e las de Mahomet n’èran pas qu’una part, es important) que podèva desvirar los uelhs. Es tot. Lo cors se debanèc tranquillament.
 
Levat que, un gojata, en conflicte dambe lo professor (e es aquò lo còr de l’ahar), e qu’èra quitament pas presenta, s’angoc plànher per le núser a son pair en tot díser qu’avèva demandat aus musulmans de la classa de levar la man e de se n’anar, puèi qu’avèva mostrat un òmi nud dambe las parts genitalas plan vesederas. Una mentida enòrma.
 
Lo pair es esmalit contra lo professor, manda messatges de colèra contra eth suus hialats sociaus, demanda sa demission deu collègi e pòrta un clam per “difusion d’imatges pornografics”. La religion  es pas mencionada. Per malastre aqueste pair coneish un militant islamic que’n profieita per botar òli suu huec e relaia la polemica que grossís.
 
E aquò cad dens las aurelhas d’un joen ahuecat islamista qu’a enveja de se n’anar hèr lo jihad en Siria, que compren benlèu pas tròp plan lo francés (es un Chechén nascut a Moscòu que parla lo rus e l’arabe) e que decidís de tuar lo professor. Solide lavetz qu’Allah, se digoc qu’es “mauaisit d’estar aimat per conasses”.
 
Doncas, se vei que l’istòria deu praube professor es pas tan simpla qu’aquò. Estoc un martir de l’ensenhament, aquò solide, qu’a perdut la vida a maugrat de la qualitat de son trabalh e sons esfòrces per trasméter lo saber a las joenas generacions, e la corporacion deus ensenhaires le pòt rénder omenatge, mes martir de la laïcitat, es un drin un destornament de l’istòria e l’Estat francés a tendéncia de’n hèr un sent republican, çò qu’es contrari a son idèia de basa.
 
Aquesta setmana, tot parièr, en tot legir la ficha Wikipedia deu cardinau de Richelieu, m’aperceboi qu’aqueste qu’installèc en França un poder ipercentralizat per la fòrça e, per exemple, la decapitacion deus adversaris politics (Lo duc de Montmorency per exemple) es considerat dens l’agiografia republicana coma lo qu’avèva “combatut dambe fermetat l’orgulh e l’esperit facciós deus Grands deu reiaume qu’abusavan deus bens que lo rei les avèva hèits.” Una grana figura d’esquèrra fin finala, una mena de Che Guevara abans l’ora …
 
Com aquò se ditz? Ah òc, cadun vei miejorn a sa pòrta …