Lo problèma amb los divendres es que, cada setmana, tornan! Me diretz que n’es aital dels autres jorns de la setmana e qu’ai pas cap de rason de vos senhalar que cada sèt jorns, divendres torna…
 
Se o fau es qu’es aqueste jorn, normalament jorn sens carn reservat al june, levat un ligombau benlèu o una trocha, me cal ataular devant l’ordenador per descriure e escriure, coma o ai promés, mon punt de vista sus l’anar del planeta…
 
Trobatz qu’emplegar lo mot planeta es un pauc pretenciós? Vos l’acòrdi mas un cronicaire que se respècta pòt aver sonque una vision plantària dels eveniments que se debanan cada jorn dins lo mond.
 
Alavetz, coma tanlèu la ràdio alucada, apreni tot,  tot lo sant clame del jorn, sus las valhanças dels politicians exagonals e las accions òrras dels estrangièrs, me’n vau generalament furgar del costat de la premsa britanica o estatsunidenca, italiana o castelhana per ne saber un pauc mai… per onestetat cap a los qu’an pro de vam, de coratge o d’abnegacion per contunhar a seguir aqueles repapiadisses e aquelas jeremiadas[1].
 
Vau començar per nòstres vesins britanics que s’autregèron, quatre ans a, gràcias a Boris Johnson, lo títol de Global Britain. Sembla pas que los estalvis realizats en sortint de l’Union europèa ajan permés de tornar trobar una independéncia perduda e una prosperitat economica que n’an plan besonh !
 
Dos eveniments van poder èsser enregistrats dins lo libre dels records: Elisabeth II es la persona qu’a agut lo règne mai long de l’Istòria del Reialme unit —70 ans— e Liz (Truss) lo règne mai cort en sa qualitat de primièra ministra —44 jorns!
 
Lo quite Churchill disiá que la democracia èra lo sistèma de governament mai marrit que siá, a l’excepcion de totes los autres…
 
Cal dire que, amb China e Russia, ne vesèm los meritis e avantatges. Un estrangièr coma ieu o vos a pas a prene partit mais, çaquelà, pòt aver un avís sus la faiçon de governar de tal o tal politician.
 
Boris e Liz venon de far la demonstracion que mediocritat,malonestetat, messorgas, etc. empachan pas de menar un país, sovent a la catastròfa per malastre.
 
China e Russia son tanben de democracias… popularas; es a dire qu’an pas res de populara  e que son pas de democracias !
 
Lo “tsar” de Russia a emberlificitat las nacions màgers de l’Union europèa desempuèi lo jorn que foguèt al poder. Es un cas tipic de Doctor Jekyll and Mr Hyde talament tan qu’Alemands e Franceses fronzèron pas las ussas quand comencèt d’aplicar son “programa” per restaurar la grandor de Russia… e intervenguèt in Georgia, s’apoderèt Crimèa e partiguèt en guèrra contra de zombis  nazis… E ara, sèm dins un entre-dos que sabèm pas ont aquò nos menarà. Los Ucraïnians , eles, pòdon pas bombardar, en principi, en defòra de lors frontièras, si que non serián tractats d’agressors… O ai ja dich: Potin se’n chauta de morir mas vòl pas morir solet!
 
Amb Xi Jinping, quitament se sembla diferent, o es pas. Coneissi pas la mentalitat orientala mas semblariá que los dirigents chineses trobèsson un resson favorable al prèp de la populacion quand parlan de las umiliacions subidas de la part dels Occidentals al cors dels sègles passats. Venguda, pel moment, l’usina del mond occidental gràcias a la passivitat d’aquelas que pensèron e pensan encara justament qu’aquelas umiliacions èran passadas per malhas… Dison qu’un Chinés a una memòria autan longa que la d’un elefant… e los especialistas s’acòrdan per dire qu’un elefant…
 
Nòstres governaires exagonals qu’an pas estudiat lo latin, cal creire, sabon pas çò qu’es un Mea culpa. La França dels Lums se pòt pas enganar e son istòria es facha  pas que d’accions menadas per l’emancipacion dels pòbles colonizats.
 
Cal èsser chinés o Rus per massacrar, per anientir d’autres pòbles… a veire los Oïgors en China e qualques autres en Russia. La Republica francesa e sa classa politica empacharián pas jamai Occitans, Bascos o Bretons de s’explicar e … aquestes o pòdon far dins lor ostal; de fèit la Republica interven pas (trò) dins la vida privada dels ciutadans…
 
Jamai los que senhorejan emplegan los mots: genocidi, genocidis lingüistics, crimis, etc.
 
A còps, reconeisson qualques errors d’apreciacion!