Benlèu un jorn, veirem de cabras sus de trotinetas prener l’autòrota. Qual sap?
 
Benlèu un jorn, veirem de bicicletas bicicletejar sus de nivols. Qual sap?
 
Benlèu un jorn, veirem lo fuòc embreissar lo solelh. Qual sap?
 
Benlèu un jorn, veirem l’aiga embroncar la luna. Qual sap?
 
Benlèu un jorn, veirem l’aire desalenar les estelas. Qual sap?
 
Benlèu un jorn, veirem la tèrra espotir lo camin de Sant Jacme. Qual sap?
 
Benlèu un jorn, veirem los fraisses grelhar sus l’estela del pastre. Qual sap?
 
Benlèu un jorn, veirem los conilhs se far pastenagas. Qual sap?
 
Benlèu un jorn, veirem los vèrmes engolir las galinas. Qual sap?
 
Benlèu un jorn, veirem las moscas picar sus las tauletas. Qual sap?
 
Benlèu un jorn, veirem de petarèlas gasar la mar Mediterranèa assecada. Qual sap?
 
Benlèu un jorn, veirem de flors caminar sus de borrilhs de nèu. Qual sap?
 
Benlèu un jorn, veirem de corbasses carrejar de letras d’amor. Qual sap?
 
Benlèu un jorn, veirem lo Potin demorar dins lo topin. Qual sap?
 
Benlèu un jorn, veirem de femnas desveladas mandar lo Raïssi a las castanhas. Qual sap?
 
Benlèu un jorn acrocaràn lo carri de la libertat e se donaràn d’ample. Qual sap?
 
Benlèu un jorn, veirem en estiu d’esquiaires lisar sus l’arena cauda. Qual sap?
 
Benlèu un jorn, veirem  de dolars nadar dins de veires de catargèna[1]. Qual sap?
 
Benlèu un jorn...
 
Uèi, vesem ben lo cat, ara, aculhir  per la Copa del monde amb seissanta quatre partidas de buta-bala dins d’estadis gigantasses climatizats de longa dins un país acalorit a trenta grasses.
 
 Benlèu que son tocats  de la coeta de la cabra!
 
O benlèu i a quicòm de mai! Qual sap?