Nadal se sarra a passets. Aprèp aver aprestat lo sap, es temps d’aprestar lo soquet de Nadal. Soquet de Nadal que pòt recampar los pichons de l’escòla per festejar las vacanças coma senhorejar sus la taula de fèsta lo jorn de Nadal en familha.
 
Cossí fargar un soquet de Nadal? Per una classa o una familha lo melhor es de prene un tub redond cartonat amb dos taps. (Mena P.T.T.) Primièr l’ornar amb los pichons o en familha. Per aquò far, es nescite d’anar cercar dins lo campèstre o de recampar de rusca, de mossa, de vesc, de grifol, d’agulhas de pin,... e tot çò que podrètz trobar dins l’environa per apolidir vòstre soquet. Passar de pega blanca tot al entorn del tub puèi pegar rusca, mossa, vesc, grifol, agulhas, estelas fargadas e descoradas. Laissar secar. Aquel soquet cal que siá polit, mai que polit!
 
Traucar los taps en dos endreches. Copar un fial de nilon de pesca o una ficèla de 1m de long mai o mens. Passar lo fial o la ficèla dins los dos traucs, estacar lo tap e nosar.
 
Tapar lo soquet d’un caire. Ben laissar despassar lo fial o la ficèla en defòra. Emplir lo soquet de papilhòtas, de bolas de chocolat, de nogat, de noses, de chuquets, de lipetariás... puèi tancar amb lo segond tap. Pensar de laissar despassar lo fial o la ficèla en defòra. Lo soquet es aprestat!
 
Lo jorn de Nadal o per fèsta far, balhar a cada festejaire un bastonet – lo melhor es lo bageta emplegada per manjar la cosina chinesa. Pausar lo soquet sus una taula bassa. Lo fial de cada tap plan estirat sus la taula. Far dos grops que siá d’escolans o en familha. “Plombar” dos còps, un còp per cada grop, amb la frasa seguenta: “Plom!Plom! Qual dobrirà lo soquet de Nadal? Plom! Plom! Qual lo dobrirà?” Alara de cada caire del soquet, lo pichon nomenat s’avança e pren lo fial o la ficèla dins la man.
 
Un grop se bota d’un caire del soquet. L’autre grop de l’autre caire. Los pichons o los bèls prenon cadun lor bastonet o lor bageta e pican sul soquet en cantant una cançon que coneisson plan o aicesta a titol d’esemple:
 
Lo grop 1 entrinca:
 
            Soqueton, soqueton,
            Coquinon, coquinon,
            De qu’as dins ton ventron?
 
Lo grop 2 respond:
 
            Cantatz! Cantatz encara!
            Vos dirai braves pichons
            De qu’ai dins mon sacon!
 
Lo grop 1 contunha:
 
Soqueton, soqueton,
            Coquinon, coquinon,
            De qu’as dins ton ventron?
 
Lo grop 2 respond:
 
            Cantatz! Cantatz encara!
Vos dirai braves pichons
            De qu’ai dins mon sacon!
 
Lo grop 1 perseguís:
 
            Soqueton, soqueton,
            Coquinon, coquinon,
            De qu’as dins ton ventron?
 
Lo grop 2 acaba:
 
            Arrestatz-vos de cantar...
            Vaquí mos braves pichons
            De qu’ai dins mon sacon.         
 
La cançon tot just acabada, lo pichon qu’es d’un costat del soquet e lo pichon qu’es de l’autre tiran fòrt al meteis temps sus lo fial o la ficèla. Los taps gisclan. Lo soquet laissa escapar las lipetariás que s’espandisson sus la taula per plaser grand dels pichons e dels bèls. Totes se congostan!
 
A cadun d’adobar lo soquet de Nadal de son biais. Parièr per la cançon. Volèm just creire qu’aquel soquet será l’escasença de partegar un moment bèl de bonur totes amassa! Bonas fèstas!