I a causas atau, que’vs hèn demandar perqué lo monde reaccionan pas mès a informacions qu’arriban e que semblan tan importantas. La responsa es simpla: depen de la plaça que’us balhan los mèdias dens la ierarquia deus subjèctes tractats. Per çò de qué vau parlar ara, semblaré, per exemple, que France 2 l’aja pas jamès evocat dens son edicion màger de 20h.
 
Lo jornau american New York Times a sasit la justícia lo 25 de genièr per obligar la Comission europenca de publicar los SMS escambiats entre sa presidenta, Ursula von der Leyen, e lo patron de Pfizer, Albert Bourla.
 
De qué s’agís? Es un escambi que tractava de la crompa per la Comission de 1,8 miliard de dòsis de vaccins fabricats per Pfizer contra lo Covid19. Cau saber qu’Albert Bourla avèva dejà refusat de vénguer au parlament en octobre de 2022 e avèva mandat a sa plaça Janine Small, presidenta deus mercats internacionaus. (Que, devath lo pos de las questions de deputats, expliquèc que pas nat essai sus la transmisison avèvan estats hèits abans la mesa suu mercat, mes aquò’s una auta istòria.)
 
Lo clam deu News York Times concernís lo hèit que Ursula von der Leyen volha guardar secretas las clausas d’un mercat pertocant la santat publica, pagat uns miliards dambe sòus publics au nom deus estatjants de l’Union, que la presidenta de la comission es supausada representar.
 
Es doncas un vergonha que s’agisca d’un jornau extra-europenc que demanda justícia sus un ahar que pertòca la democracia en Euròpa, on pas nat jornau (levat benlèu lo Bild aleman), nada television, nada ràdio, nat partit politic sembla pas aver lo coratge ni la possibilitat d’ac hèr.
 
Après l’escandale deu Qatargate (sacas de bilhets venguts deu Qatar retrobats dens l’apartament d’Eva Kaili, vici-presidenta deu parlament europenc), la moralitat de las instàncias de l’Union sembla fòrtament aflaquida.
 
La darrèra informacion qu’arribèc estoc aquera qu’una “instància deu parlament” a refusat a l’encòp de demandar a Ursula von der Leyen de respóner publicament a las demandas deu deputats sus aqueste ahar e tanben d’interdíser l’accès deus sòcis deu lobby de Pfizer au parlament, qu’an … un burèu a dispausicion.
 
Se volètz detalhs sus aqueste clam deu jornau american, ensajatz pas de’n trobar sus France 2, qui difusèc divendres un reportatge sus las chouquettes o une familha que practica la bicicleta en vacanças en bòrd de mar…