Ancuei anam parlar de causas que son de deviacions legalas o quasi.
 
 
Los motards son simpas?
 
Ben cada matin quora vau al trabalh, los tròbo gaire simpatics quora, en nombre de mai de doas mans, son a despassar sus la via de’n fàcia, que sètz en fàcia, e que encara vos fan d’apèls de fars, o mai que lèvan las mans per dire que sètz de colhons. E gaire vos dison mercés amb lo pè. Solament quora sètz sus la mema via per que doblèsson, coma aquò vos, rotlatz dins la benda laterala dal camin per vos agantar las pèiras e los clavèls suspresa.
 
Mas quora los gendarmas son aquí, la linha la pagan. Quora son aquí los gendarmas.
 
 
Los caçaires son simpas?
 
Lo drech de caça es per els. Se cal obligatoriament arrengar amb los caçaires. Avètz minga autra causia. Al melhor.
 
Senon, se trufan de vòstra proprietat. E òc, se i son ren de barrieras, pòlon ren devinar que son sus una proprietat privaia... Pecaire. Degun se’n avisa d’anar caçar sota l’aiga dal costat dal fòrt de Bregançon, non? A v-oèi mas dos peses doas mesuras, òu!
 
E pi las nuàncias son grandas, an lo drech de rabatre mas non de tirar dins una proprietat privaia. Ba, cu farà la diferéncia sensa garda de caça, luectenent de lobateria, o gendarma a costat?
 
Ai lo recòrdi de jovença d’èstre dins lo cabanon dal grand e de sentir los plombs calar sus la taulissa en fina plueia, un bèl jorn de plen solelh! Magic moment.
 
Caçar permete de tirar sus qualqu’un tot en èstre protegit en invocar l’inadverténcia. Sensa permés de caça, es la preson dirècte.
 
Lo permés de caça permete de tirar, a la causia, sus una mameta qu’estira —e non que tira— lo linge dins lo sieu òrt (cas en Roergue), de tirar sus un anglés (cas recent), desolat d’èstre dins la vòstra proprietat. Sio maldisent, son d’errors.
 
Se cal levar dal mitan quora es la sason de caça, senon es de la vòstra fauta, avètz de pulsions suïcidàrias en plaça de pulsions de natura! O alora lo permés permete de reglar de còmptes en familha entre caçaires, o de tuar lo sieu can sensa besonh de l’acusar de la ràbia. Sio maldisent, encara.
 
Las tartarinaias de caça son un image que correspònde quora vesèm los ravans que laissan los caçaires per far d’agachons dins los bòscs (carcassas de veituras), dolhas en quantitat astronomica sus lo sòl, botelhas e traças de fuecs laissaias en plan. La classa... ecologica. E òc, se ditz que los caçaires permeton de limitar los nosibles: singlars, per lo mai. Mas los gendarmas, son mai formats e abilitats d’o far. Son de gents d’armas coma l’etimologia o indica. Los caçaires son ren de professionals.
 
Anatz discutre, solet, a mai dins la vòstra proprietat, enrodat lèu per una banda d’òmes armats, e gaire assabentats dal drech de proprietat. E encara, despí pauc, aüra, los caçaires an plus lo drech de caçar a partir d’un cèrt taus d’alcolemia. A bòn? Avans èra possible de caçar sensa limite? I es de que se demandar perqué los occitanistas son ren devenguts totes de caçaires! Serian entenduts per lo govèrn, vist que la legislacion sembla de los sostenir... O mai, motards e caçaires! Aver lo drech de passar la linha blanca, insolentar los autres e lo drech de lor tirar sus. La classa!