Glifosata: La justicia de Luxemborg oblitja lo governament a tornar autorizar l’usatge del glifosata. Èra lo primèir país europèu a n’aver interdit l’utilizacion fa tres ans. Un bon exemple de justícia independenta…
 
Pesticidas: Lo ministre de l’agricultura francés quicha pel manten de la difusion d’un pesticida dangeirós (sabi pas s’es utile d’ajustar l’adjectiu): lo S-metaloclòr. Fa l’anóncia un 1èr d’abril, mas es pas brica un peis risolièr. Deu pas èsser al fial de l’ambicion ecologica del president. Bon, poirà totjorn èsser pompat (lo pesticida, pas lo ministre) dins las napas freaticas per emplenar las bacinas!
 
President: Lo president novèl de la FNSEA a una expleitacion grandarassa de 700 ectars, mas sustot mena una gròssa entrepresa agrò-industriala. Res que l’associacion dels dos mots te balha freg dins l’esquina.
 
Anniversari: Les Amics de la Confederacion Païsana festejaràn lors 20 ans (es pas cada jorn que l’òm ten 20 ans!) sul Larzac, del 12 al 16 de julhet. Vint annadas contra los OGM, contra las bòrias de mila vacas e de te sabi pas quant de pòrcs, contra l’industrializacion de l’agricultura – veire çai-sus –, contra los grands projèctes inutiles o las bacinassas, e a l’encòp per una autra politica agricòla comuna, pel contraròtle de l’alimentacion e de sos circuits, per mai de païsanas e de païsans… Es pas l’òbra que manca! Rendètz-vos en julh de 2103 pel centenari de l’associacion!
 
Despelhatge: La ministra Marlena Schiappa met a nus sa pensada dins una entrevista a Playboy, mas demòra vestida (per l’ivèrn?).
 
Patz: L’ONU es l’organisme internacional per presicar la patz entre totes los pòbles e arrestar los conflictes. Règlamentariament, vaquí qu’es Russia que se trapa per l’ora a la presidéncia del Conselh de securitat. I a quicòm que truca!
 
ONU: Es que Russia serà concernida per la demanda dels parents occitans alprèp de l’organizacion d’aver lo dreit de nomenar lor pichon Artús?
 
Suls dets: Maites organismes internacionals venon de tustar (en paraula) suls dets de França per sas practicas linguisticas e sos biaisses policièrs. Urosament que vivèm (fièrs e contents) al país dels Dreits de l’Òme. Per las Femnas, sabi pas: es pas clar!
 
Estrategia de la paur: Quand una manifestacion bèla s’anóncia, lo reflèxe del Ministre de l’interior Darmanin es de predire lo nombre de policièrs que va mobilizar per poder crear incidents que li permetràn de barjacar sus l’ecolo-terrorisme o sus las pretencions revolucionarias d’una esquèrra venguda esquerrista per el!
 
Lo còrse interdit en Corsega: Lo tribunal administratiu de Bastià a denegat los articles del règlament interior de l’Amasasda de Corsega que prevesiá que se podiá discutir en còrse e en francés. Se al còr d’ un poder autonòme, i a pas d’autonomia…
 
Independéncia: Lo novèl primièr ministre escocés nomena un ministre encargat de l’independéncia al moment ont l’idèia es en baissa. Lo paure ministre aurà plan de trabalh!
 
Ordó: Justament, Humza Yousaf prestèt serment en 2011 al Parlament escocés en anglés e ordó, la lenga d’origina de sa familha paquistanesa. Aquò l’empacha pas d’èsser independentista escocés…
 
Intelligéncia artificiala: Es que se poiriá pas revirar en lenga nòstra pel tèrme d’asenada vertadièra?