• Retiradas: Los nòus savis del Conselh constitucional an jutjat segon lo dreit aprèp totes los camins de travèrsa que prenguèt lo govèrn per faire acceptar sa lei contra las retiradas. Lo savi embarrat dins sos còdis (e fraire/sòrre o cosin-a d’aqueles ministèris que trevèt de temps) sap res de la vida vidanta. Es atal que la paura Constitucion camina de guingòi.
 
• Faraon: En faguent venir la sepultura de Ramsés, es un biais de dire que se faguèt progrèsses dempuèi l’Antiquitat: el, foguèt faraon 66 ans e moriguèt sens aver pres de retirada! Nos voldrián faire creire qu’arrestar a 64 ans es aver un sòrt melhor qu’un rei! Nos i daissarem pas prene!
 
• La francesa que val pas un ardit: Aquí que, dins una entrevista ràdio, la cantaira Francesa Hardy ditz èsser espantada per la situacion en França amb totes aqueles moviments contra una lei per las retiradas qu’ela tròba de las bonas. Te pauses pas questions se « Mas ieu, me’n vau tota sola” (pauròta!): es que ta solesa (e aicí es pas la solesa del Jòrdi Mostaquí: “soi jamai sol amb ma solitud”), te la cèrcas plan, alara que, nosaus, caminam amassa dins lo lanç frairal dels passa-carrièras!
 
• Los uèlhs barrats: Que China siague una dictatura sembla d’una evidéncia clara. Se vei plan lo sòrt reservat a la populacion d’Ong-Quong e lo respècte del jòc democratic dempuèi lo cambiament d’estatut. Alara quand China la granda fa montar lo grà de las amenaças contra l’iscla ont la democracia viu patin-patan, que demòra de faire al cap del país dels Dreits de l’Òme: tampar los uèlhs? Seriá temps que dobriguèssen una botiga de lunetas del costat de l’Elisèu per que President e ministres pòsquen veire clar sus las realitats viscudas en França (ont pareis que res se passa), en Euròpa e dins lo monde!
 
•Pif: Ieu tanben quand èri pichon legissiái las aventuras de Pif (e de tota la freta: Pifon, Ercules, Tonton, Tatà, Rododó, Riquiqui, Rahan, Artur-la trèva, Jaume Laucet-l’òme invisible, David Croqueta, Miquèl Valent-lo correire de veituras, Nasdina Hodjà, Ranhar-lo Viquing, Totòcha,… — aquí l’autor escampa una lagrema sus l’enfància perduda —) dins Vaillant. Mas soi pas vengut president de la Republica: me demandi plan çò que s’es (o s’es pas) passat!
 
• Tot se pèrd: Fabian Rossèl es elegit al secretariat del Partit Comunista amb unes 80 % de sostens. Es a unas causòtas atal que se vei la pèrdia d’importància d’una formacion. Dins lo temps, un secretari nacional èra elegit amb per lo mens 102 % de las voses.
 
• Catalans: Aprèp l’Amassada de Corsega pel còrse, son ara quatre comunas de Catalonha-nòrd que tenon problèma amb la justícia administrativa en rason de lor volontat d’utilizar lo catalan dins las discutidas e per las deliberacions del conselh municipal. Quora es que municipalitats occitanas van aver un tal problèma?
 
• Mbappé: Lo pauròt ganha solament 6 milions d’èuros per mes. Tot just 200 000 èuros la jornada, çò que fa pas solament 10 000 èuros de l’ora: una vertadièra misèria. Francament, me pensi que quicòm vira pas redond!
 
• Musèu dels Espòrts: Lo Musèu dels Espòrts de Niça presenta d’aquesta passa una mòstra artistica sus las Victòrias per preparar los Jòcs Olimpics de París. La victòria es plan, mas cresiái que l’essencial èra de participar e nos sovenèm mai d’una desfaitas istoricas puslèu que de victòrias anonciadas. Pensi ça-que-la que manca un document de primièra: la prefiguracion de l’aficha de la finala de la Copa del monde del rugbí de XIII de 2025 que se debanarà a… Niça!
 
•La Seria: Un autre còp, dins aquesta tièra de cronicas, vos parlarai de La Seria. Mas soi segur que n’avètz fintat los episòdis…
 
 
 
 
Guingoinet Roch