Lo 14 de març passat, avèvi escrit una cronica on disèvi que votar per un programa es quicòm de pas racionau d’un punt de vista democratic. Avèvi pres l’exemple de l’edat de la retirada: la majoritat a elegit aqueste que la va botar a  64 ans lavetz qu’ara, la medisha majoritat la vòu guardar mès de d’ora, çò que perpausava la candidata qui estoc pas elegida. Calèva causir entre la pèsta e lo colerà. Atau tot lo monde a perdut las eleccions, levat los 19% que volèvan Macron tre lo purmèr torn.

Ara m’es vengut un aute exemple. Lo 16 d’abriu, l’Amassada Nacionala de l’Estat francés a discutit e votat sus un subjècte fòrça particular: lo deus menuts vegetarians dens las cantinas escolaras. Vau pas parlar de la resulta, qu’aquò pòt faussar la soscadissa segon que los deputats hascón una causida que’vs agradaré o pas. La question es pas aquesta.

La question es meslèu de saber quin ròtle a jogat çò que pensa lo pòble d’aqueste subjècte que pertòca tota la populacion. Soi segur que savèvatz pas qu’aquò estoc debatut e votat dens "vòstra" cambra de representants. Es aquò lo problèma.

Au moment de l’eleccion deus deputats, sabi qu’aquesta tematica estoc pas guaire abordada dens vòsta circonscripcion. Los representants an doncas hèit çò que vòlon.

Per vos balhar una idèia de l’imparcialitat deus debats, lo deputat que parlèc per LRM s’apèra Jean-Baptiste Moreau, e es … neuridor bovin, çò qu’assegura una cèrta neutralitat aus escambis e a la presa de decision.

Ajudats per la manca d’informacions de cap au public, los elegits son protegits de l’opinion e pòden estar contactats en tota tranquillitat per los grops de pression professionaus. De saber qu’au parlament europèu, aquestes lobbies an burèus a l’endehens de la bastida.

Aquò’s pas qu’un exemple de tot çò que’s decidís sense que poscam balhar nòste avís. Solide i a tanben subjèctes fòrça tecnics e complicats que demandan un estudi abans de’s prononciar, mes causas atau de la vita vitanta deverén estar au mens anonciats e la volontat deu pòble respectada.