Lo Tribunau Administratiu es un grand luòc d’educacion civica das populacions indigènas que sens relambi la Republica reeduca.

Dimars passat 18 d’abriu 5 conses catalans èran au Tribunau Administratiu dau Clapàs.

Avián aguda l’idèa falorda que podrián parlar catalan pendent lors discutidas. E, per geinar pas digus, de revirar tot çò que se diriá.

Quina idèa! Vesètz plan çò que son d’aquelas populacions. Fa gaire, en Corsega, volguèron tanben parlar còrs a lora Assemblada. Oresco referens. Cal èsser sens cervèla per imaginar parlar catalan en Catalonha e còrs en Corsega!

Urosament avèm lo prefècte, eiretatge benvengut dau democratic empèri roman per administrar las conquistas.

Zo vos mandèt aquesta populacion au Tribunau e i prenguèron una bèla leiçon de civilizacion.

La raportaira publica e votz dau govèrn, rementèt que se deviá aplicar l’Ordenança de 1539 la de Villers-Cotterets qu’impausa lo francés pertot (e tanben l’us de la tortura dins la justícia).

Puèi sempre a votz doça refusèt l’idèa de la revirada que, orrificament, fariá pèrdre au francés sa supremacia en èsser “lenga de traduccion, lenga segonda”.

Atau es, revirar fa tòrt au francés. De segur van suprimir lèu-lèu dins las bibliotècas que son publicas tota la pseudo literatura, filosofia e sciencia estrangièras reviradas e editadas en francés.

Puèi venguèt lo representant dau prefècte. Apondèt tranquille que pel catalan e autras lengas regionalas “Tot usatge es illegal”.

Atau tot es enebit.

Es simple, clar, universau. Es francés que!