A l’escasença de la venguda del President Macron a Gange dins Erau, avèm apres que lo mot occitan “caçairòla” se revirava en francés: “dispositif sonore portatif.” E aprenguèrem tanben que los tustadisses de caçairòlas èran enebits.

Es a se demandar perqué? Es dont mai curiós que sabèm dempuèi un brave briu que lo President a las aurelhas tampadas. Es sordanha. Cossí los tustadisses de las caçairòlas pòdon lo trebolar estent que los ausís pas!

Es qu’èra o qu’es per velhar a la tranquillitat dels policièrs? Benlèu aiman mai ausir picar sus de caçairòlas que de passar a la caçairòla. Es qu’èra per assegurar lo ben viure dels Ganjòls? En plena jornada,aquela manifestacion pacifica aviá pas l’aire de los trebolar gaire. Los tustadisses los an empachat de dormir! 

Alara, perqué enebir las caçairòlas se trebolan degús? Qué vòl dire? Per melhor comprene, cal tornar a la dicha: “rabalar de caçairòlas”. Consistissiá a estacar amb una cordèla una caçairòla a la coeta d’un chin per far de rambalh, per far de bruch. Lo gos s’espolsava per ensajar de destacar la cacairòla nosada a la coa. Èra sovent una bestiesa de jovença de gojat.

Benlèu lo President crei que de far calar los tustadisses farà oblidar la caçairòla de la refòrma de la retirada. Pensa que de dobrir, a la lèu lèu, d’òbras novèlas, amai se son en fach ancianas, farà endavalar los seissanta-quatre ans sens mastegar. Crei tanben que d’anar “al contacte” farà calar los repotegaires. Sap que lo temps es aspirina bona.

Lo President voldriá descaçairolejar los tustaires mas es el que deuriá se decaçairolejar. Lo sol biais, per el, de n’acabar amb la caçairòla “retirada” seriá de retirar la retirada a seissanta quatre ans. Mas per aquò far, caldriá que se destapèsse las aurelhas e qu’aguèsse de mestièr!