Fa ja quauqueis ans que la comuna de Cogolin a levat sei panèus bilengas per l’entrada d’aglomeracien (Cougoulin, plaçat a tres entradas, pas generalizat per lei carrièras, u, fau pas desconar) sota lo nom francizat de la comuna. E rèsta per lo moment dins lo sector Grimaud- Grimaou. Ren de veire emb lo Plan de la Torre qu’es tot bilenga, panèus d’entrada de vila e mai noms de carrièras!

Entre lei doas comunas raia la Giscla. Es una ribiera que ven dei Mauras e se geta en Mediterranèa.

Coma per totei lei toponimes occitans, que son rarament respectats, bèu promier en Provença, fuguèt francizat.

Devenguèt tot oficialament dau monde la Giscle.

Alora lo temps passant, d’unei an fach partir de deliris per dire qu’èra un reau qu’aviá estat bensai mau ortografiat. E i èra una ipotèsi: èra la Gisèle a l’origina. De qué s’estofar. L’etimologia populara èra en camin. Tot es possible.

Un reau chamja ben de nom entre La Mòla e Cogolin, la ribiera dicha la Verna ven La Mòla en entrar sus la comuna cogolinenca. Veridic.

Mas sempre mai luènh.

Aüra, en passar lo pònt, es per anar encara mai luènh qu’Avinhon. En luec de chamjar Giscle en Giscla, coma se fa de còups dins d’autras regions per redonar vida a la forma d’origina, quauqu’un a corregit e barrat l’s de Giscle, per far mai francés probable!

Per fortuna Google maps a pas encar enterinat aquèu dictat individuau. Nimai lo cadastre comunau. Mas tot es possible, coma vos aviáu ja presentat un autre còup amb l’opinion sus Lo Franchimand luec dins leis Aups auts.

Bensai qu’un jorn dau ponch de vista grimaudèu serà la Giscle e dau ponch de vista cogolinenc serà la Gicle. S’espera la Giscla ressuscitada au mitan dau pònt.

Qué pietat! Totjorn sensa pietat per l’occitan qué!