Lo Tolosa Fotbòl-Club s’es ganhat la Copa de França. Podètz faire tindar las caçairòlas! Se reprenguèt en còr lo Se Canta (que calguèt una mobilizacion bèla e una peticion per lo gardar dins l’Estadium quand los americans arribèron). Los Indians pòdon brandir la bandièra dels comtes Raimon. Encara que d’unes estadièrs confisquèron a espectators fiulets, cartons roges, gwen ha du,… Se faguèt una granda fèsta al Capitòli per gaitar amassa la finala lo dissabte e, lo dimenge, per la recepcion de l’esquipa e de la Copa.

Ara, òm se pòt pausar la question de saupre s’aquela victòria es una victòria occitana? Lo club mondin aparten a un fons american L’Aucèl Roge (enfins: Redbird Capital Partners) qu’es tanben proprietari del Milan-AC, e qu’investís dins lo beisbòl, lo fotbòl american, los panièrs traucats… Aquel monde òm se demanda se sabon la circonferéncia d’un balon, se jamai i an tustat dedins dins un prat amb lors sabatons o se de corbas coneisson solament las de la Carrièra de la Paret (Wall Street) e del Dow Jones. Se sap lo grand interés de l’Oncle Sam per l’espòrt. Las partidas de basquet, d’oquèi o de lor sembla-rugbí son calibradas non pas segon l’interés esportiu mas segon la possibilitat d’includir le mai que se pòt d’anóncias publicitàrias pendent los arrèsts de jòc que se multiplican! (E vos parli pas del financièr que partís un bèl matin: demandatz als Girondins de Bordèu lo còp que li faguèt en 2021 lo Rei de la Carrièra - King Street, un autre fons american). Sèm plan luènh dels quatre sòuses que se van demandar al garagista del canton o al grossista en legums o al peissonièr per marcar son nom sul malhòt o dire sa marca al micrò a la pausa.

Èrem acostumats (aquí sèm partits per una sequéncia nostalgia) a clubs que representavan lo quartièr, lo vilatge o la comuna. Aqueles pichons qu’aviás vist tre l’escòla de rugbí, de fot o de palma-man, puèi venir bèls: poletons, benjamins, minimes, cadets, puèi juniòrs (bon, ara pòrtan los noms mai poètics d’U-5, U-7, U-9, U-11, U-13, U-15, U-17, U-19,…). Enfins, un jorn, jogava un bocin de partida en primièra, puèi veniá titular e indispensable. Un còp la carrièra acabada, prendriá en man l’entrainament dels pichons e la ròda contunhava de virar. Aqueles jogaires que coneissiás (que coneissèm encara) e que pòdes interpellar liurament dins la setmana (lor i farà una pausa dins lo trabalh o al moment d’un aperitiu), per tornar comentar las partidas e lor i balhar conselhs contraris als qu’estipula l’entrainaire (que coneisses tanben, mas qu’a tendéncia a s’enganar). La fiseltat a las colors es quicòm de fòrt. E lo fin del fin es de capitar de faire venir un jogaire de l’esquipa vesina (un bon de segur!) e apuèi plan de contactes e d’apèls del pè : aquò mostrarà la soliditat del projècte local e farà d’el un renegat en çò seun!

Bon, amb los jogaires venent de pertot e copats de las realitats localas e una comunicacion mestrejada especializada en lenga de fusta e en formulas tota faitas, sèm pas dins lo meteis esquèma. Òc, sèm plan luènh de nòstra concepcion (vièlha?) amb lo TFC! Los jogaires venon de tota la planeta e son pas unes recrutors que los son anats quèrre: non, son algoritmes de performanças dintrats dins una maquina pre-programada que sortiguèron lor nom e que foguèron contactats. Tolosa es sinonime de Babèl e lo sol jogaire francés (ai pas verificat s’èra occitan) dintrèt dins la partida a cinc minutas de la fin! L’alquimia de l’espòrt fa qu’aquel recampament fonciona e reçaup l’adesion e l’identificacion dels sostens. Abans d’èsser aparisenquit, lo Messi, jogaire del Barça, podiá èsser un simbòl de catalanitat! Seriá benlèu pus simple de faire jogar los algoritmes entre elis e lo GatGPT tendriá la rubrica esportiva!

A se demandar tanben se per n’arrestar amb las batèstas de bendas de sostens fadurlas, valdriá pas mai convocar (lo biais es de trapar) 22 jogaires (pel fot), aver dos pialòts de malhòts (los roges e los blaus per exemple), puèi faire las formacions en pimant coma se fasiá dins la cort de l’escòla per las recreacions e puèi seguir la partida: l’osmòsi de las esquipasse fasent per la sola poissença e lo sol plaser del jòc (Vos disi pas lo chantièr per organizar una Copa d’Euròpa o un campionat del monde!).

Bon, es pas lo tot: acabi aquí aquesta cronica que me cal preparar lo desplaçament de Pentacosta a Narbona per las finalas del XIII!

Escopeta Roch