Se pausar questions, es una activitat permanenta: virar a dreita o a esquèrra? Seguir lo Congrès o l’Acadèmia? Se gratussar lo nas o l’aurelha? La vida es un grand questionament fait de pichonas imprecisions decisivas. Vaquí doncas unas questions aparegudas d’aquesta passa. D’unas pòdon benlèu trapar responsa: mas soi segur que vos pausaretz la question de la bona responsa de balhar!

Manjatz occitan: L’autre jorn, èri al conselh regional de Tolosa a la granda discutida sul devenir de la lei Molac. A miègjorn, se teniá un manjadreit. Alara, que la Region paga fòrça publicitats per nos incitar a manjar occitan, pòdi concebre que siague una dobertura sus la Mar nòstra d’aver porcions de tabolé. Per contra, se los catalans èran representats per una aiga petonejaira d’Ogeu, quid dels vins occitans (Corbièras, Menerbés, Cabardés, Malapèira, Fitor, Pic-sant-Lop, Faugièras, Sanch Inhan, Caurs, Fronton, Galhac, Madiran, Costièras de Nimas, Terraças de Larzac, Marcilhac, Cremant de Limós,… e ne passi): pas una gota!Contradiccion?

Cambiament de nom: La Valeria Pécresse debateja lo licèu Angela Davies contra la decision del Conselh d’Administracion (li agrada mai: Ròsa Parks, es totjorn aquò!). L’explica: Angela Davies a dit de mal de França e a denonciat son biais colonialista dins las relacions internacionalas. Me demandi se la Valeria Pecresse va menar campanha per debatejar totes los establiments escolars que se dison Jules Ferry?

Maleta de ròdas: Lo municipi de Dubrovnic ven de prene una mesura radicala: per la patz e la sòm dels estatjants autoctònes (aqueles qu’an pas encara transformat lor ostal en B-and-B) an interdit l’utilizacion de maletas de ròdas per carrièras. Las maletas: a la consigna! Quora una tala mesura a Carcassona?

Americanizacion: La polícia deu contribuir a la securitat de la populacion. Unes faits recents mòstran que d’unis policièrs viran puslèu del costat de l’insecuritat. An los collègas americans coma exemple?

Diable o Super-diable: Quand pòdes pas sofrir lo Potina e sos biaisses dictatorials, poiriás èsser content que qualqu’un li venguèsse en contra. Mas quand lo qualqu’un se sona Prigojine, sembla pas possible de causir l’un puslèu que l’autre que los dos son de botar dins la meteissa saca.

Ecologia diferenciada: Per metre en abans de conferéncias mondialas sul climat, de convencions ciutadanas e d’objectius bèl, los governaments franceses s’i entendon. Dins la realitat: pas de contraròtles, sanccions derisòrias o inexistentas, non-aplicacion dels règlaments, culpabilizacion de las populacions, bassinas e esquina plegada fàcia a l’agricultura industriala: pensatz que lo macronisme es soluble dins l’ecologia?[1]

En jaune: Pogaçar o Vingegaard? Qual se ganharà lo torn de França (que se passa bravament en Occitania) ongan? Es pas encara aqueste còp qu’un occitan ganharà l’espròva… De mai, es fòl lo nombre d’ikurina que se vegèt long de las rotas d’Euskadi e de Pirenèus, regularament tanben un gwen-ha-du… Per çò qu’es de la bandièra roja de la crotz jauna, semblariá que i age un pacte secrèt entre occitanistas e occitans per que Macarèl fague quincanèla… Es talament complicat de brandir la bandièra nòstra?

Eperqué Roch