Fa gaire, au mes de mai, lo Tribunau Administratiu de Montpelhièr aclariguèt d’a fons la rason de l’interdiccion absoluda das lengas istoricas dau país.

Lo tribunau a jutjat coma o demandava la prefectura, es a dire l’Estat. L’interdiccion de parlar catalan dins las comunas catalanas es totala emai se i a revirada au francés.

Lo jutjament ditz plan que la traduccion fariá dau francés una “lenga de revirada” e qu’aquò li fariá pèrdre sa “supremacia”.

Tornarem sus la “lenga de revirada” que sembla un concepte de granda qualitat e merita d’i soscar. Per ara vesèm lo grand aclariment d’aqueste jutjament: la compreneson empacha pas l’interdiccion.

L’argument sempre servit de la necessitat d’’impausar lo francés coma lenga comuna per assegurar la comunicacion entre los ciutadans es declarada nulla per la justícia. O sabem plan e dempuèi bèl brieu qu’es pas mai que de farlabica e sonque una retorica de justificacion faussa.

Baste qu’agachem la Soïssa tota pròcha per veire qu’un país pòt èsser coerent e democrata sens lenga communa.

Lo tribunau ditz plan que la rason vertadièra de l’interdit, es la “supremacia”. Deu èstre absoluda e tota traça dau parlar istoric forabandida.

Es la pratica supremacista que coneissèm plan d’una republica que se reclama sempre dau grand democrata lo rei Francés 1er, e dau Jules Ferry supremacista e racista ufanós. Lo tribunau confirma que l’amira es jamai estada la compreneson (alibi) mas la destruccion das culturas-lengas autoctònas.

La matriça coloniala e imperiala es sempre plan viva. Es aquí, en França constitutiva de l’Estat.

Atau lo progrés progressa e l’avenidor s’inquieta.

Adieussiatz