L'estiu es temps de música e de fèstas popularas. Dins ben de vilas e vilatges s'organizan d'eveniments ont participan decò totplen de grops musicals o culturals Occitans. Sempre mai numerosas son las vilas de la pianura pimontesa (de lenga piemontèis: Coni (Cuneo), Fossan (Fossan), Centallo, dinc a Turin (Torino) e Savilhan (Savigliano) per aculhir de concèrts de grops Occitans mentre que ben sovent dins las comunas Occitanas, protegias per la lei lingüística sus la minorança occitana 482/99, lhi eveniments abó grops culturals locals son marginals en lhi programas estivals. D'un latz se polèm ralegrar dal fach que la cultura occitana siá apreciaa decò en territòri non autoctòna e se felicitam abó aquilh que capitan de la portar en territòris non Occitans mas se demandam se, a un moment d'objectiva e viscua regression de la lenga e de la cultura occitana en las valaas occitanas de Pimont non siá necessari de concentrar se lhi esfòrces pròpri en territòri occitan alpenc. Ben de joves subretot entre la generacion di millennials, retenon la nòstra cultura coma un factor representant "lhi ancians", un element minoritari en que non reconóisser se. Pròpri per aquilh motius cresèm que siá necessari cultivar la cultura di nòstres territòris, mai avans que dintre las vilas!

Totun l'unic factor verament unificant de tota la sabença occitana es la música. Non despreciam questa oportunitat! Non se fondre abó lhi autres genres musicals!