Vaquí una lenga que’vs agrada. L’atz apresa pauc a pauc, tot solet dens vòstre canton, dambe passion e un líber solide, mes tanben en espiar filmòts sus la telaranha o encara biaishes de tots.

Fin finala vos sentissètz prèst peu viatge e vos getatz dens l’aventura. Lo país es beròi e vos regaudissètz de véser que tot es escrit dens aquesta lenga aimada.

Atau legissètz panèus de publicitat o afichòtas de seguretat, çò qu’auretz pas jamès hèit en çò vòstre. Aquò rai, lo plaser es aquí.

Puèi arriba lo moment quan vos cau parlar a quauqu’un. Aprestissètz una bèra frasa dens vòstre cap, e haut, la sortissètz plan coma cau a vòstre interlocutor.

E ara, catastròfa, eth se ditz que parlatz fòrça plan, benlèu quitament qu’ètz deu país, e vos respón viste, tròp viste per comprénguer. Solide atz trapats uns mots, mes la significacion de la responsa demòra fòsca.

Vaquí çò qu’arriba a fòrça monde dambe los quaus èi parlat. Jo medish pòdi díser en italian “Il mio nonno era piemontese” (mon grand èra piemontés) com un vertadièr estatjant d’Alessandria, mès me cau mauhisar que la responsa sia pas tròp longa e pas clara per tot comprénguer.

Es per aquò que cau trobar un biaish per anonciar purmèr a la persona qu’ètz estrangièr. Çò de mès simple es de díser “Bonjorn” dens vòstra lenga e dens la seuna, atau comprenguerà qu’es en preséncia de quauqu’un que parla pas sa lenga pròpria. Un petit moment d’esitacion abans la frasa, “mmm” es quitament recomandat. E solide ensajar de parlar pas tròp viste.

Es dambe aqueste conselh, balhat per mantuns glotofiles, que’vs desiri un bon estiu dens la practica de las lengas, solide.

Hmmm, adishatz, arrivederci.