Lo mes d’agost es lo moment dins lo calendari politic que las causas s’apasiman. Coma las entrepresas de bastiment en general. E per los òmes e fremas politics, es parier.

Mas generalament lor estacament, s’es familial o d’adopcion, al nivèl engatjament legislatiu, aquest territòri despassa ren los interèsses politics generals o las vacanças coma l’anam veire.

De còups n’aprofièchan per una pèira dos còups e doblar las vacanças d’un passatge dins tala comuna per tal subjècte politic.

Mas la question occitana rarament. Totun i rèstan ben un pauc de temps mas una question, se meton en contacte amb d’elements d’occitanitat ailí, al mens la manjuca?

Al mes d’agost, coma sovent los precedents presidents, Emmanuel Macron e sa molher Brigitte sejornan al fòrt de Bregançon. Es sus la comuna de Bòrmas, dins lo departiment Var, a la gròssa entre Ièras e Sant Tropetz. Es la residéncia d’estiu oficiala dals presidents de la República despí lo 1968. Dal costat mairal, sabèm ren de la prigondor de l’estacament a la cultura gascona de sa grand (senon an una villa dins l’estacion balneària dal Touquet-París-Plaja proprietat de Brigitte Macron qu’i van a partir de París, es a costat).

Avans el parier. D’estiu, aüra Nicolas Sarkozy e sa frema Carla Bruni van sovent al cap Negre en Provença maritima. Lo rèire president de la Republica rèsta dins la residéncia familiala de son esposa.

François Hollande li agrada Provença qu’a una residéncia segondària a Mogins, entre Lo Canet e Moans Sartòu. Mas Lemosin es tanben important per el que lo rèire president de l’Estat rejonhe regularament son fèu corresian, Tula qu’i èra cònsol uèch ans a de reng.

Elisabeth Borne la Primiera Ministra avia passat sos comjats en la Provença maritima, dins Var ja en 2022 al Pradet, en fàcia de la rada de Tolon. Es un luec vesin dal fòrt de Bregançon per de questions de trabalh mai que probable, quora i èra present Emmanuel Macron.

En estiu, Eric Dupont-Moretti lo ministre de la Justícia se gaudisse d’una villa compraia a Niça.

Olivier Klein, ministre en carga de la Vila e dal Lotjament, va en Lengadòc, dins Gardon cada an d’estiu despí qu’es adolescent. Entorn d’Alès que n’a aprofechat per far de visitas professionalas tanben.

Gérald Darmanin lo ministre de l’interior avia causit la Provença maritima, las Bocas de Ròse precisament, en 2022.

Jean-François Carenco, ministre en carga dals Otramars, a un ostal de 250 mètres carrats dins Lengadòc mai precisament dins Erau. De notar qu’es coautor de “L’espérance occitane”, Barelli, Boudy et Carenco, Ed. Entente, 1980. Nòta: los autors: Ives Barelli, Joan-Francés Boudy, Joan-Francés Carenco. Èran escolans de l’ENA. Es aquò qu’escandalizèt Michel Debré (filh de Robèrt e paire de Joan-Loís Debré).

Prefaci de Robèrt Escarpit. Qualquas linhas de la quatrena de cubèrta: Un grop d’enarcs lança aicí un messatge de tolerància e de generositat: prepausa per Occitània un programa pedagogic, cultural, administratiu, coerent amb lo respècte de l’unitat nacionala” [“Un groupe d’énarques lance ici un message de tolérance et de générosité: il propose pour l’Occitanie un programme pédagogique, culturel, administratif, cohérent avec le respect de l’unité nationale”]. L’i a ren de revolucionari mai mòstra qu’emai dins aquels mitans l’occitanisme avia caminat.

Sylvie Retailleau, cargaia de l’Ensenhament superior, va sovent en la Provença maritima, qu’a naissut a Niça.

Entre los ancians candidats a la presidenciala, veguem dos d’els.

L’estiu, Valérie Pécresse o passa sovent en Corresa, dins l’airal que comença Alvèrnhe dal ponch de vista lingüistic. La familha de son espós, l’òme d’afars Jérôme Pécresse, es originària de Combrossòl, vilatjòt al sud d’Ussèl.

Éric Zemmour es un familiar de la Provença maritima, de Var e particular. Departiment en cors d’urbanizacion qu’a rejonch los Alps Maritimes en nombre d’estatjants. E qu’i a trobat d’electors sus aquelas tèrras en pèrdia de cultura nòstra. Sejorna cada estiu dins una luxuosa ostalaria cinc estelas, segon Libération. Pausa sas malas al castèl de Valmer, fàcia a la plaja, sus la comuna de La Crotz Vaumar. Es entre Cavalaire e Garcin (francizat en Gassin).

Per las mai cortas vacanças d’ivèrn, sabèm gaire dire. Los Alps e los Pirenèus occitans an d’estacions d’esquí famosas.

Après costat de la Val d’Aran, sabèm que l’ivèrn d’òmes politics espanhòls van esquiar a Vaquèira e Beret. Celèbra estacion d’esquí occitana per Espanha.

Encara costat Pirenèus occitans gascons, Aigas Bonas amb Goreta, Sent Avantin amb l’estacion sonaia “Luishon Sus Banhèras”, Genos qu’a l’estacion dal Vath de Loron, Lus e Sent Sauvaire e ne’n passo. Sensa obliar en los Pirenèus occitans lengadocians l’estacion de la Vila d’Ax (la Vila d’Acs), l’estacion de Camurac entre Camurac e Montalhon, entre autras.

E dal costat dal Pimont occitan, de politics piemonteses coma qualques autres probables van esquiar a Limon, Sestrieras, Lo Sause d’ors entre autras.

Vesèm doncas que, al mens per lo mes d’agost, la Provença maritima e tanben un pauc Lengadòc son de tèrras de torisme e de relaxacion de politics. De segur d’autres territòris occitans an lors òstes politics, mas mens importants al nivèl nacional. Mas totun que menan de politicas sensa resson particular a lor preséncia en tèrra d’Òc.

Ben d’autres òmes e fremas politics passan de vacanças en Occitània, mas sensa estacament particular a la lenga occitana. Dins la massa, lors contactes a la tèrra d’Òc lor a gaire fach pilhar de decisions legislativas per salvar l’occitan.

E se comprèsson de diccionaris e gramaticas occitans per emparar la lenga occitana aquest estiu? Bota!

Referéncias:

— declaracion de patrimòni a la Nauta autoritat per la transparéncia de la vida publica,
— pàginas Wikipèdia respectivas.