Opinion
Reviscòl e idèias vièlhas
Tèxte legit
- Es un classic dels partits politics de preparar los endemans que cantan en parlant de reviscòl e de renaissença. Es çò que nos fa, per exemple, dempuèi quauquas annadas lo partit macronista.
D’unas formacions son mens conegudas e s’acontentan de pinturlejar parets e panèus publicitaris, d’empegar afichas e pegasolets. Quala foguèt pas nòstra suspresa del costat de Carcassona de descobrir inscripcions signadas: Novelum. De qué se passava? Las tropas de l’IEO de Dordonha, menadas per un rèire-filh de Bertran de Bòrn e armadas de pèiras agudas, se serián lançadas a la conquista (o la reconquista) dels terradors lengadocians? Pro qu’agèsson fait seguir trufas negras, patanas sarladesas, fetge gras, tiron confit, cabecons, castanhas e noses, vins de Monbazillac e de Brageirac, e tanben las òbras completas de Micheu Chapduèlh e de Joan Ganhaire, sèm prèstes de los aculhir e, puslèu que de pintrar sus las parets, pintarem.
Mas aquí, paure monde, arrèsti la colhonada. Novelum? Tal es lo nom que s’es balhat un grop de l’ultradreita (los que pensan que lo Recampament nacional es d’esquèrra) que se definís coma nacionalista e identitari e qu’explica que lo nom significa en lengadocian: reviscòl. An un eslogan plan susprenent: Volèm viure al país! (Mas, vos demandi, qun país?). Per logo: sus fons de crotz occitana, l’anhèl pascal del blason de Carcassona (manca lo fons de flors de liri), que pòrta una berreta basco-bigordana tot en brandissent un auriflam de la crotz celtica! Lo 11 de novembre, pintrèron que se caliá rebrembar dels peluts que defendèron França (pas dins l’esperit del Claudi Martí que met aquelas paraulas dins la boca del paure soldat desconegut: “França, som mòrt a tas guèrras / Rocroy, Verdun e Rivoli / Mòrt per pas res, plan mòrt, misèria /Per Loïs Catòrze o Galliéni.”).
Darnièra aficha vista: Français, tu es ici chez toi: réveille-toi! Bon, aicí, ieu cresiái puslèu que los franceses èran venguts en Occitania, non? E que los endormits, serián puslèu las occitanas e los occitans. Sus aquela aficha, un grop d’un autre bòrd a pegat un papafard d’una autra mena que ditz que las frontièras assassinan.
- Sus la placeta de darrèr l’ostal, sus la placa del distributor de saquets per amassar las cagadas dels gosses, qualqu’un-a a plaçat un pega-solet de l’Action française.
Deviscolat Roch
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
E ben ...a Albi tanben, avèm los nòstres...
Se fan apelar "Patria Albigès" ( aital escrich)...emanacion locala del grop d'ultrà-drecha "Generation identitaire" e un dels menaires es lo filh de Frederic Cabrolièr....deputat RN de Tarn
Grop violent, racista, omofòb...., tres d'entre eles ( dont lo filh Cabrolièr) son per ara jos contraròtle judiciari dins l'espera del procés lo 29 de Setembre....
Lo paire Cabrolièr presentèt " Patria Albigès" coma una "...organisation locale de jeunes nationalistes en butte aux gauchistes albigeois...."
Aquí....aviam ben : "Funeraire Cathare", "Estetic' Oc " , per de que pas : "Patria Albigés"
Bonser, veni juste d'apréner la novela, e , en tant que president de Novelum lo sol lo vertadier,ieo 24, menarem nòstra enquèsta per fin de confondre quilhs tròç de fotrassons qu'usurpan lo nòstre brave nom.
Arrestatz d'acusar d'extrem dreicha tot çò sembla esser anti-occitaniste.
La vertat, quò es qu'emben l'afar dau Niger, França perd un impôt colonial de 500 milliards de dollars per an que prélevava sur 14 de sas ancienas coloniaus. Que quò vòl dire? Que França fai bancarota d'autant mai si l'òm ten compte de la deta.
E França a paur de s'ecartelar en bocins e de morir de sa bela mòrt. Alaidonc chau sauvar lo soldat França, apelar a l'unitat, s' arquebotat sur una istòria que pus degun ne vòl.
Per los occitanistes s'agis de propausar de las solucions que satisfajan las revendicacions nacionalas occitanas mas tanben l'interest comun a tots los françes e subretot pas separat la lenga de l'economic .
A l'ora ente i a pus d'estat frances e de partits que son capables de surtir de la crisa, la rota es druberta per las minoritats per bastir autra causa.
Surtir daus chamins tots druberts per prener un viratge a 180°? La politica de l'esquerraa es pas differenta de la de la dreicha. La religion e lo comunisme fan pus receta. Mesma l'ecologia e l'umanitari son estats recuperats per los poderos. Mesfiatz-vos tanben du tsunami intelectuel qu'arrieba.
Soi pas segur que sia legal de pausar lo nom d una associacion existenta , me sembra que novelum (IEO perigord) es una associacion lei de 1901 doncas podrian plan far renonciar aqueles palhassas d utilitzar aqueste nom . Per çò que es de "volèm viure al pais " me demandi se i auriá pas quicòm sembrant . En tot cas seriá pas ininteressant d'atacar en justìcia aqueles tròcets de nècis ,foguèsse pas que per nos destacar plan d'eles.
Escrit à la man sus un autre panèu de la carrièra : « Terre Plate » (???!!!)
E çaquelà vira !
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari