Arribi tot escàs d’un lòc fòrça popular e toristic, lo Pòrt Leucata. Solide, de ser, au moment de’s minjar una glaça e tot se passejar, podètz crotzar un milierat de personas que son aquí en vacanças. Podètz doncas observar la populacion e vos rénder compte de las tendéncias deu moment. Es un de mons espòrts favorits.

E me soi apercebut d’una causa que m’i escadi pas d’explicar. La casqueta de baseball es fòrça a la mòda e particularament aquesta dambe un NY escrit dessùs, coma "New-York". Ne trobaratz a pièlas. E lavetz perdequé la màger part d’aquestes encasquetats la pòrtan au denvèrs?

Me diseratz qu’es pas grèu e benlèu qu’auratz rason. Mes totun, me demandi s’ac hèn per rason de d’originalitat o de conformisme? Solide la visièra es aquí per protegir los uelhs deu sorelh, mes lavetz de qué pòt servir la casqueta sense visièra? Per balhar un look, èi plan comprés, e aquò s’agís sense de dobte d’un marcader generacionau, tot es bon per se semblar pas la generacion precedenta.

Mes es mancat, pr’amor que la generacion precedenta a adoptat la casqueta au denvèrs e tot lo demès.

Mes es pas tot. La mòda estant çò qu’es, atz sense de dobte vist que l’immensa majoritat deus mascles son ara barbuts. Atencion, pas barbuts coma nòstes peluts de las annadas 70, non pas, mes de la barba plan talhada e deu peu ras au dessùs de las aurelhas. Aquò balha au mot bărbat en roman lo vertadièr sens de "òmi mascle"!

Es solide un derivat de la mòda hipster que pensavi estar acabada. La resulta es doncas curiosa.

Dambe aqueste abonde de tipes dambe la casqueta de baseball au denvèrs, qu’an generalament clucas de sorelh e una barba, çò que deisha pauc de plaça per marcar la diferéncia de la cara, ajustatz lo-camisòt-que-tot-lo-monde-pòrta (de butabala, Jack & Johns, …) e espatlas e braces cobèrts de tatoatges, atz l’impression de crotzar la medisha persona sens de cès suu pòrt de Leucate, deu maitin dinc au ser, cada cinc minutas.

Solide vau pas jutjar aquò, sabi pas çò que pensavan lo vielhs de nosautes quan èram joens, e ara que soi un vielh con jo medish, coneishi pas totis los elements de pensada de la navèra generacion.

Mes totun, aqueste clonatge (atencion, sense "w"!) me divertís plan e’m haré quasi regretar mons punks damne un rat sus l’espatla e mons baba cools apelhats en teishut indian…

Enfin, autes temps, autas costumas. En croate: Takva su vremena….