Avèm relevat ambe plaser l’article de L’Indépendant qu’anonciava Le XIII rapproche les peuples amb una fotografia de sostens del Tolosa Olimpic e de Swinton que bevián un còp amassa a l’estanquet de l’estadi Domèc. L’espòrt es aquò: un monde frairal pel plaser dels jogaires, dels espectators e dels vendeires de cervesas. L’espòrt es aquò, mas l’actualitat ensaja de nos mostrar lo contrari:

• Es plan de fòbal-rugbí: Totas las partidas de la Copa del Monde de XV se jògan dins d’estadis ont evoluisson regularament equipas de fòbal.

• Los copiaires: L’utilizacion de la vidèo, lo carton jaune, la 50-22 (en plaça de la 40-20), lo remandadís al pè de jos los pals, los protocòls- comocion: es fòl lo manca d’imaginacion que i a cò dels quinzistas, totjorn a copiar las avançadas esportivas e ludicas del XIII !

• Los tustaires: Que de bandas de capbords de sosten de club de fot se truquen sul morre, aquò malastrosament es tròp sovent una realitat. A Sant-Estève, son montats d’un cran: l’autre còp, a Rodés, se son fotuts sul morre dos grops de sosten dels vesitaires. Mas ont son los Verds d’antan?

• Liura circulacion: Quand lo PSG venguèt a Tolosa lo 19 d’agost, interdiccion als sostens parisencs de se passejar en vila e parcatge estrict dins l’estadi. L’espòrt es sorga de rapròchaments… perdon, d’aluènhaments !

• Liura circulacion: Es quand d’ultràs de Bordèu èran ja arribats en Corsega que la prefectura d’Aiacciu interdiguèt lor dintrada a l’estadi ! Lo sindròme de la finala de la Copa d’Euròpa a l’estadi de França ganha lo país que se darmanina?

• Lo poton: Lo president de la Federacion espanhòla de fòbal tròba natural de potonar de fòrça sus la boca una jogaira de la formacion nacionala. Lo machisme totjorn viu !

• Equitat: L’equipa de França de vela es tota contenta de se poder entrainar pendent doas annadas sul plan d’aiga de Marselha. Aquò per sublimar l’equitat amb los autres participants que coneisseràn mens los luòcs !

• Se ditz/se ditz pas: A Marselha, se ditz pas “París 2024”, mas “Jòcs Olimpics de 2024”. La nuança es de talha !

• City-park: Una famosa invencion aqueles tarrens sintetics que florisson dins los vilatges amb panèus de desquet,… Ont son los tarrens de tèrra e d’èrba ont s’agoludar dins la fanga e l’aiga…? Una marca de mai de l’americanizacion de la societat?

• Stade-2: Que l’emission Stade-2 passe sus la 3, es ja quicòm. N’ai pro de veire funambuls, alpinistas, davalaires en qué que siague, volaires dins los aires, dançaires e ne passi en plaça dels espòrts de totòm e de la simplicitat d’unas practicas…

• L’espòrt contra la cultura: A París, an demandat als boquinistas de barrar e desmargar lor botiga del temps dels Jòcs olimpics ! Pareis qu’es per que siaguen pas maluroses de s’apercèbre que los esportius sabon pas legir ! Vertat que se vei mai esportius se concentrar en escotant musica, se lor i demanda (Stade 2, encara) çò qu’escotan mas pas çò que legisson ! Alara qu’es fòl çò qu’un esportiu pòt legir coma informacions o, pel mens, lo tablèu d’afichatge, lo planchòt (ara electronic; es luènh lo temps del cambiament de la marca a la man!), las publicitats suls malhòts, L’Équipe, lo Midòl, la cronica 13 del Jornalet lo dimars,……

• Escrivans e espòrt: Las edicions del Volcan venon de publicar Des écrivains et du sport ont s’apren qu’Albèrt Camus, Luis Sepúlveda,e Pier Paolo Pasolini jogavan al fòbal, Jack Kerouac al fòbal american, Colette fasiá gimnastica, Agatha Christie de surf, Ernèst Hemingway de bòxa, Arthur Conan Doyle jogava al cricket,… Mas, i mancan los libres de l’IEO-Aude sul XIII, lo roman de Fredric Vouland La Partida clandestina, lo roman d’Alfrèd Raucolas e Ramon Gogaud L’Afirolada, la cançon de Papa-Gahus sus Duclos-Lassale,…

Atletic Roch