x       Aquí que lo sistèma infernal de comunicacion entre los umans se ditz pas mai Tuit-Tuit mas X. E vos devi dire aicí mon incompreneson totala de me trapar amb aquela x coma inconeguda, ieu que soi pas sortit de Politecnica. M’apèli pas Descartas que faguèt aquela causida per designar l’arithmos del matematician grèc Diofante e lo shay de l’arabi Al-Khawarizmi.

x       Es una vertadièra crotz per ieu de vos escriure sus aqueste afar d’autant mai que los istorians pensan que la crotz de Crist teniá aquela forma de X e non pas la de totes los crucifics que se trapan dins las glèisas. De tot biais, vau pas demorar los braces en crotz qu’aquò m’empachariá d’escriure aquesta cronica.

x       Òc, cossí resòlvre aquesta eqüacion cubica de la forma ax³ + bx² + cx + d = 0 amb a non nul, ont los coeficients a, b, c et d son en general supausats reals o complèxes.

x       Qual coneis lo Sénher X qu’interveniá dins una emission sus unes afars secrèts sus France-Inter?

x       Encara urós que sapie qual soi e que coneguèri paire e maire: non, soi pas nascut jos X! Mas coma los rasals a-socials son factors de secutament: es fòl totes los X inconeguts que se passejan per dire de mal del monde. N’i a vertadièrament un nombre x totalament desconegut que se liuran a aquelas practicas per x rasons de marrida fe.

x       Lo cambiament de nom de l’afar informatic ven del patron Elon Musk que presa aquesta letra. Comptatz pas sus ieu per anar beure un veire de muscat de Sant-Joan o de muscadet amb el qu’aquel afar es un pauc fòrt en notz de muscada!

x       X es la multiplicacion que son entrepresa, en mai dels messatges a bodre, se lança dins los pagaments en linha, lo comèrci e los servicis bancaris. Los grafistas susan la camisa a trapar de dessenhs que parlan e balhan enveja amb polidas tipografias e colors mirgalhadas. Aquí, lo lògo es dins lo despolhament: una X blanca sus fons negre, per marcar lo despolhament a venir dels utilizaires?

x       Quand as moneda, ne vòls aver mai (aquel monde escampa pas los sòuses per la finèstra) e doncas lo simbol multiplicator es natural a un òme que balhèt ja lo nom de X.com al sistèma que venguèt Paypal e qu’a nomenat un de sos filhs X Æ A-12 (lo pauròt!). x Notatz qu’al bas d’un document, una X, una crotz, pòt èsser la signatura de qualqu’un que sap ni escriure ni legir. Justament, dobti que las/los que van usar a fons dels X (ancianament tuit-tuits) seràn capables d’escriure un roman bèl o quitament un quatrin.

x       Clar tanben que lo Musk a res de véser amb lo Malcòm X qu’expliquèt que causissiá la letra per ramentar totes los aujòls esclaus deportats d’Africa.

x       Unes poètas veson dins la X lo dessenh de doas personas que se potonejan, mas anam pas redusir a una sola letra tota la literatura d’amor dels trobadors.

x       Notatz, que se pòt totjorn portar plancha contra X! I aurà plan mai que dètz rasons per ba faire.

x       M’an dit qu’a la Pòsta mancavan de factors X.

x       De qué faràn los catalans que prononcian ch las X?

x       Poiretz totjorn ensajar de passar aquestas regas als rais X e furgar per i trapar un cromosòme X. Mas m’a costat de temps de vos escriure tot aquò: plan mai qu’al Jaume Ickx per faire un torn de pista a Monzà o a Francorchamps! Me caldriá crompar un novèl modèl BMW de la seria… X!

KXWY Roch