De costuma, lo monde divisís los protagonistas deu conflicte de l’Orient Mejan entre Israelians e Palestinians, entre Jusius e Musulmans. Per jo, es una error complèta. De saber qu’aquesta analisi ajuda pas de trobar una solucion, qu’aquesta batèsta perdura dempuèi lèu 80 ans.

Jo divisissi entre los que vòlen la Patz e los que vòlen la Guèrra. Aquestes darrèrs an un interès de prénguer lo poder suus autes. Los que vòlen la Patz son fòrça mès numeroses, mes es hèra aisit peus polemofiles (que vòlen la Guèrra) de hèr créisher dens lo cap deus autes un sentit de venjança per crimis cada còp mès òrres.

La màger part deu monde vòlen espiar créisher lors mainatges en patz e víver tranquilament e dignament. Mes los que vòlen lo poder se servissen de la Guèrra per arribar a loras miras. Son doncas aliats objectius.

Lo cas deus eveniments recents mostra clarament aquesta aliança objectiva en accion, entre, ara lo Hamas e Nataniahó. L’organizacion palestiniana a plan ajudat au purmèr ministre que’s devèva acarar a una oposicion fòrta de la carrèra dempuèi gaireben una annada e ahars juridics. Ara tot es estancat.

Se cau pausar las bonas questions: lo Hamas a amendrit per son accion deu 7 d’octobre la fòrça militara israeliana? Pas brica. Lo Hamas a balhat a Tsahal una rason per bombardar encara mès e dentrar dens la benda de Ghaza? Solide. Quin aute aliat auré podut ajudar atau lo poder israelian?

Es per aquò que jo ne cresi pas una minuta au hèit que l’organizacion d’aquesta operacion sia “passada complètament devath los radars deus servicis d’entresenhas israelians”. Lo govèrn egipcian a quitament indicat aver informat Tel Aviv de l’imminéncia d’una ataca d’amplor uns tres jorns auparabans. E ara lo poder israelian ditz tocar pas sonque ostaus de sòcis deu Hamas mercés aus sons servicis d’entresenhas que son actius dens la benda de Ghaza.

Tot a l’entorn de la benda de Ghaza los terroristas se son desplaçats sense estar empachats. Uns testimoniatges parlan d’un delai de 6 a 10 oras abans une intervencion de l’armada. En tot saber que l’Estat israelian a ajudat lo Hamas a la debuta de son istòria (cf Washington Post), e que Nataniahó a pas empachat son finançament per, oficialament, divisir los Palestinians, nos podèm pausar la question de “qui hè qué” e “qui jòga quin jòc”.

Entre una mair israeliana que plora sa hilha qu’es estada tuada a la rave party peus fesilhs deu Hamas e una mair palestiniana que plora sa hilha tuada per una bomba de Tsahal dens la benda de Ghaza, vesi pas nada diferéncia e boti pas nat “Òc, mes …”

Totas duas son victimas deus faucons de lor camp “pròpri”.