La setmana passada, balhèi ma vision de la situacion a l’entorn d’Israèl, es díser que, segon jo,  s’agís non pas d’una guèrre deus Israelians contra los Palestinians mes d’aquestes que vòlen la Patz contra los que la vòlen pas. Èi parlat doncas "d’aliats objectius" entre Hamas e Likod.

Mès anar mès, informacions nos arriban e la situacion sembla a cada còp mès clara, o, se volètz, mès estranha. La version oficiala es que la dehensa israeliana estoc suspresa per una ataca palestiniana qu’avèva pas pervista. Aquò sembla pas tròp logic, en tot saber que, dempuèi, nos sèm assabentats que:

• Èra precisament lo jorn deu cinquantau anniversari de la guèrra deu Kippor (!). La dehensa israeliana auré podut pervéser quicòm de la part deu Hamas. Estoc, aparentament, pas hèit.
• Ancianas guardas-frontièra de Tsahal an explicat dens una entrevista qu’èra absoludament pas possible de sortir de la benda de Ghaza sense d’estar reperat e tirat d’un biaish automatic, pr’amor qu’una "quita çarnalha suu mur avia una alarma".
• Lo govèrn egipcian (ac digoi la setmana passada) a ditz aver pervengut Tel-Aviv d’una ataca imminenta.
• Quan Tsahal bombarda Ghaza, mira ostaus on demòran responsables deu Hamas. Sovent ne publican lo nom quan l’an tuat. Aquò vòu díser que son par¶ticularament plan assabentats sus la situacion acerà. Aurén pas ausit parlar de l’ataca deu 7 d’octobre? Aquestes servicis son los mès bons deu monde.
• Lo jornau israelian Time of Israel explica que guardas-frontièra an avertit lo govèrn dempuèi meses sus activitats pas costumièras deu Hamas a costat de la frontièra, "sense d’estar escotats".

Cadun ne poderà dedusir çò que vòu, mes la possibilitat que lo govèrn israelian e particularament lo purmèr ministre Nataniahó ajan pas estats assabentats de çò que quicòm se debanèva me sembla mauaisit de créser.