Opinion
Quaranta-quatre, caracacac!
Tèxte legit
Es tornat lo temps ivernal de las quinas! Bon, se pòt gaire ganhar polalhas ara, que los lòts son remplaçats per bons de crompa: çò que fa que pòdes faire plan mens lo fièr o la fièra a la fin de la partida amb ta recompensa d’aver plan pausat los grans de milh (excusas: las pèças de plastic) sus las bonas casas.
Lo tiratge de n° s’acompanha, de la part de l’enquantaire o dels participants, d’unas frasas e formulas ritualas e plan espandidas dins lo país occitan: ne traparetz tièras e libres sus la question. Lo ròtle imprescindible del cronicaire es de vos proposar d’autras formulas alternativas e renoveladas. Se pòt jogar amb los mots, los sons, los n° dels departaments de França, dins un esperit trufet, ludic, civic, pedagogic, lunatic, elastic, anacronic…
Vaquí una primièra tièra:
1: Mèfi: Atilà arriba!
2: dos coma los amoroses,
3: val pas res; fa pas res
4: jogatz puslèu a la belòta!
5: cinc sòus costèron los esclòps…
6: l’ora de la sièsta
7: los pecats capitals; las tièlas de Set(a)
8: vaquí la nuèit; los patanons/tirons son cuèits
9: tot nòu sortit de l’uòu; atal comença la cançon de nòu
10: dos còps los cinc dets
11: los tusta-balon;
12: los apòstols; los meses de l’annada; Roèrgue; …
13: lo rugbí
14: an tuat Jaurès!
15: lo Cantal; l’aligòt; la trufada
16: Vos cal manjar ceses – las pantoflas
17: e òc, se desossèt, lo pauròt…
18: Fai passar la cantina / un veiron de tres-sièis!; la majoritat; lo dreit de vòte
19: lo tractat de Versalhas
20: sens aiga de segur; Corsica nazione; …
21: umatz lo vin/lo vent
22: Lo radar; la video-susvelhança
23: aquò cava prigond
24: los tags sus las parets
25: lo quart de cent; Santa-Catarina, balhatz-me la quina!
26: los nogats
27: la mòstra
28: la mòstra de las missaras
29: la granda crisi financièra (bon, se pòt confondre amb plan d’autras datas)
30: mèfi als cocodrils (de Nimes)
31: mèfi a la vesina que las mametas aiman la castanha; es pas Tolosa que vos farà ganhar; se Garona aviá volgut; lo n° dels plan vestits /de las plan vestidas
32: fetge gràs
33: un còp de Bordèu e la partida repren!
34: e rau, pataflau!
35: l’iscla vilana; es pas plan saja
36: lo Front Popular; los congièts pagats; blum, blum, tralalà; …
37: sèm trenta a aver set!
38: malastre: l’esperit de Munich
39: trempe coma un sòu nòu
40: las lanas dels motons
41: volètz chucar un Vichei?
42: garganta doça; doçor per la garganta
43: lo nombre cardenal
44: lo Caracacà es tradicional e obligatòri!!!
45: ne sèm pas qu’a la mitat
La seguida un còp venent!
Quinairon Roch
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
La quina dels afars de la setmana. :
- Ambe sa nòva Twingo, Renault leva l’escomesa de la vuèitura electric de menor còst (low cost).
Ardit fai tirar !
Aqui Renault que ven d’ anonciar oficialamant l’aviament de sa Twingo electric de «menor còst» a 20 000€ enfòra del bonus, sarià a posita tre 2026. Aquela anoncià ven apèi que Citroën e sa nòva C3 qu’es tanben devèrs los 20 000€ per 2025. La batalha per la pichona vuèitura electric ciutadina es en camin.
D’apèi çò que se pòt destriar sul image revertarià la Twingo de 1993.
Per l’autonòmia s’en sap ren de ren. Segurament deu pas petar plan luènc !
Aja me la presa tè, me cal tornar cargar lo daquòs… non pas benlèu ! Setz al pus mai dels recargaments autrejats. Vos damora de quichar sus las pedalas del becus. !
A nòstre :
-A Graulhet la filièra del cuèr torna naisser e de desversifica.
Dempuèi d’eiadas considerada coma la capitala mondiala del cuèr enant de se chorrir, la vila de Tarn agacha los actors de la filèra se multiplicar.
Atal la « Cartablière » e los Talhers « Fourès » doas entrepresas presentas al darnier salon del « made in France » enant de pensar benlèu un jorn al salon « Fabregat en Occitània ».
Dins Tarn nau entrepresas son al delà de 100 000 000€ de chifra d’afars.
-Dins Erau
La secada se fasent , las dorgas d’asaigatge ecòlogic « Oyas Environnement» veson se dierbre de novèls mercats.
Pimièra de l’asaigatge de per dorgas de terra cuècha fabregadas a la man, l’entrepresa d’Erau cultiva las valors del « made in France » un jorn benlèu del « fabregat en Occitània »
« Oyas environnement » qu’es a sant Joan de Fòs 34150, ten un CA en 2022 de 1 926 810 €
Dins Erau son 35 entrepresas que son al delà de 100 000 000€ de chifra d’afars.
- Dins lèu, la piòta del « thanksgiving » 24 de novembre, e ongan de qual es la piòta, lo piòt ?
Apèi es lo black Friday
Puèi tirarem cap a Nadal .
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari