Opinion
Lo cap de Potina
Uèi un “scoop”! Anam menar una operacion especiala, anam dintrar dins lo cap de Potina. Cossí dintrar dins la tèsta de Potina?
Ensajèrem de dintrar per la lenga i arribèrem pas. A pas una lengueta a una lengarassa! Es una lenga de pelha! Sarrava las maissas, barrava la boca. Quora voliam li arrapar la lenga, nos tirava la lenga aquela caraunhada de Potina!
Ensajèrem de dintar pel nas. Podètz pas saber coma pudís del nas, pudís! Pudís! Compreni que las moscas, los moissals, los tavans, los taisses, los rabasses li viran al entorn. E ara compreni perqué quora aculhiguèt lo moisset Macron aiceste se tenguèt a sièis mèstres d’el!
Ensajèrem de dintrar per las aurelhas. Quinas aurelhas a aquel tipe. Devon datar de l’epòca sovietica! D’aquel temps aviá pas de borra a las fuèlhas mas ara, es un bartàs. Es embartassat de las aurelhas. Per qu’ausigue quicòm cal trompetar, trompetar a la kalach. E encara!
Ensajèrem de dintrar pels uèlhs. A d’uèlhs viraires. Sabi pas se sabètz de que son los uèlhs viraires. Es a dire que quora agacha a drecha vei solament lo còstat drech de la realitat, quora agacha a senèstra vei solament lo costat senèstra de la realitat, vei pas jamai la realitat en fàcia!
Tancat de pertot, sabiam pas cossí dintrar din la tèsta de Potina. Tenguèrem conselh. Nos diguèrem que lo melhor èra de sonar Erdoğan que lo coneis plan. Nos aconselhèt la trepanacion. En matèria de trepanacion Erdoğan i se coneis! Tombava plan dins nòstra còla, aviam un metge trepanaire de mestièr.
Lo faguèrem venir. Primièr nos diguèt que l’afar se presentava plan. Èra pas la tinhassa de Potina que l’empachariá de traucar. Èra ja un punt bon. Puèi, nos demandèt ont voliam traucar. Nosautres, pecaire, sabiam pas!
Ajustèt que se traucava sul front, seriá benlèu la carròta Estats-Units e Joe Biden que sortiriá. Se traucava sul suquet, seriá benlèu la carròta Ucraïna e Zelensky que sortiriá. Se traucava sul clusquet, seriá benlèu la carròta operacion especiala, KGB, FSB que sortiriá! Ajustèt que se el podiá carrotar Potina, podriá pas analisar las carròtas.
Afortiguèt que las carròtas son en Russia al Kremlin que lo FSB las analisariá. Alara, tenguèrem conselh e nos demandèrem se podriam un jorn carrotar Potina!
E nos diguèrem: las carròtas son cuèchas!
Clamenç - Umorista occitan.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
L'òm creu qu'en estant umoriste l'òm a lo dreit de far n'impòrte que. Mas una caricatura es totjorn politica. I en a d'autras qu'an menat daus attemtats en França.
Critican, critican. En demorara totjorn quauqu'a ren e demorara la guerra a un niveu politic o a un niveu pus bas.
En nurissant una faussa polemica, l'òm nurit Raminagrobis, autrament dich l'òm se bat per los merchands de canons o de medicaments chimics.
Es pas estonant si jornalet en es a cerchar daus sostens financiers e intelectuaus.
La creativitat culturala, occitanista o autra, se batit sur de las valors que reconeis l'autre, que critica pas, que juja pas. Canta l'amor, la patz, la solidaritat.
Jesus Crist a pas dich "aimatz-vos los uns, los autres". An dich""aimatz-vos d'abòrd en prumier". Si vos aimatz pas vos-mesme, podetz pas aimar l'autre.
L'ensenhament nos a acostumat a veire las taras de l'autra mas pas la fusta qu'es dins nòstre uelh.
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari