Pareis que la Tèrra se rescaufa. Se la Tèrra se rescaufa, las femnas coma los òmes se rescaufan tanben. Es temps de passar a la clim personalizada. Amb de camisas e de vèstas climatizadas, de bralhas e de bralhetas climatizadas, de calçetas e de calçuras climatizadas. Sens oblidar lo mini-ventilador, acrocat a l’aurelha, davant lo nas e la boca vira que viraràs. Seriam polits l’estiu en plena canha amb caduna e cadun un mini-ventilador davant la trufa! Aquò nos fariá ni caud, ni freg!

Pensi tanben als chins amb un mini-ventilador acrocat a l’aurelha. L’aplicacion de l’esmartfòna esperariá pas que lo chinet tirèsse la lenga per lançar lo mini-ventilador. Aquí per la partida morre de la bèstia. Per la partida cuol, se podriá tanben la climatizar en acrocant un mini-ventilador a la coeta. L’aplicacion de l’esmartfòna esperariá pas que lo chinet boleguèsse la coa per lançar lo mini-ventilador. Aurián aital un chin climatizat de cap a pè. Per un còp que pensarián al ben èstre de las bèstias!

L’estiu quora te passejas dins una veitura climatizada e que veses: platanas, robes, fraisses, faus,... de las fuèlhas totas passidas, a la rajada del solelh, totes assecats, te demandas los arbres tanben se dison pas: “Perqué nosautres seriam pas climatizats?” “Perqué climatizarián pas totes los arbres e las plantas de la planeta?”

E quora auràn climatizat cada femna, cada òme, cada bèstia, cada arbre, cada planta, cada peis, cada aucèl e ne’n passi... caldrà ben que se botan a climatizar las montanhas, las mars, los flumes, los rius, los valats, los valadets ... Sens oblidar de climatizar l’aire, las estèlas, las nivols, lo vent...

Lo rescaufament climatic un mercat avenidor! Soi segur que Daikin, Samsung, Hitachi, Mitsubishi e n’oblide... i an pensat! Un mercat avenidor quora caldrà climatizar non solament la Tèrra, mas Mars e benlèu la Luna! Qual sap?

E la planeta, pas neta, de se dire: tant que viri fau de torns!