Diga! Ai d’aqueles italians! O avètz pas legit dins la premsa? A Genòa un perruquièr que dins son salon vendiá de drògas autras que per los pelses, se faguèt denistar e agantar per la brigada dels estupefasents que tròp de calvets dintravan dins son magazin, alara que, vistablament avián pas grand causa d’i faire. Emai agèsson pas inventada la podra que peta, los carabinieri aguèron pasmens aqueste còp l’esperit mai ponchut que lo genolh de la Tanta Nina. Me diretz qu’es pas necite d’èsser ben coquin e finaudèl per destapar aquela mena de pastís: un que ten lo suc pelat coma una cogorla a cò d’un perruquièr es un pauc coma s’òm te veniá dire que l’IEO d’Erau organiza son viatge de fin d’annada au castèl de Macron a Villers-Côteret. Sens partir los pelses en quatre o cercar borra sus un uòu, i aviá e i auriá question de se pausar.

Òm i poiriá veire pasmens una mena de discriminacion, mas es antau. “Perqué un calvet auriá pas lo drech d’anar a cò dau perruquièr? De còps que i a los cons passan per las escòlas, non?

Lo problèma ara, cranes amics qu’avètz la bombona que se despalha, cars capplumats, cars clòscapelats emai vautres los coronats e tonsurats es que sètz suspèctes d’èsser acros a la cocaïna. D’aquí que lo mond vos dison de z’ipís i a pas luònh! D’unes començan de contar sus ràdio Platana que son aquelas potingas que niflatz que vos an poirida la calòta e desplumada la clòsca mai segurament que lo rondup tua la tèrra.

Vòls que te diga? Ai pasmens una solucion de vos prepausar. Basta de se faire tatoar una berreta sus lo cigarron a l’endrech que i butava un còp èra la paura vòstra cabeladura. E rau! Poguèssetz vos i faire empeutar una tufa de pelses negres, una flòta en plen dins lo mitan per remplaçar lo cavilhòt de la berreta fariatz miranda. E coma aquò, tranquillons, tranquillets, poiriatz tornar a cò dau perruquièr s’aquò vos canta.

Enfin, es çò que ne dise, ieu…

La guinhada de l’IEO34. E, rau!