Cada jornada nos pòrta informacions navèras suu conflicte entre los pacifistas e los bellicistas de l’Orient-mejan. Es per aquò que cau aténguer totjorn un pauc abans de’s hèr una opinion. Un punt sus çò que sabèm ara (e aquò pòt encara cambiar):

• L’estat major de l’armada israeliana sabèva que lo Hamas aprestissèva una ataca, avèva recebut un document que l’explicava, guardas-frontièras avèvan confirmat qu’avèvan vists exercicis de preparacion, e lo govèrn egipcian ditz qu’avèva pervengut son omològue israelian. Version oficiala: i cresón pas. Question: lo govèrn (e doncas Netanyahu) ac sabèva o pas? Mon vejaire: solide, es pas possible que non, e au mens èra pervengut peu govèrn egipcian.

• Segon un article deu jornau israelian Haaretz, au moment de l’ataca contra lo hestenau de musica, elicoptèrs de Tsahal arribèn e causèn tanben la mòrt de civius. Aquò esmaliscoc fòrça lo ministre de l’armada, lo Sénher Yoav Gallant, que miacèc d’atacar lo jornau en justícia.

• Faussas informacions s’espandiscón sus l’ataca deu 7 d’octobre: nenets escapitats o passats au horn. Aquò, per malastre, bota lo dobte sus tot çò qu’estoc condat sus aquesta funèsta jornada. I a totun filmòts hèits peus atacants que pròban los murtres. Mes çò de curiós es de saber perdequé es lo govèrn israelian que’s lo sol de possedir aquestes filmòts, lavetz que sons suspausats estar utilizats peu Hamas coma propaganda.

• Segon unas cadenas soïssas francofònes, lo Hamas reivindica pas atacas contra civius. Solide pòt mentir, mes es un element pauc coneishut en çò nòste, e nos podèm demandar lavetz perdequé afirmar aquò se los actes terroristas son pas hèits per justament terrorizar la populacion?

• Los soldats qu’an tuat los tres ostatges israelians ac hascón lavetz que caminavan dambe un drapèth blanc e uglavan en ebrèu de tirar pas. Segon la version oficiala, “se sentiscón miaçats”. Aquò’s possible, son joenòts espaurits que son dens l’armada e es tròp aisit de jutjar sense de conéisher la situacion suu terrenh. Mes d’un aute costat, tirar sus quauqu’un que camina dambe un drapèth blanc es contrari a totas las leis internacionalas suus conflictes, e aquò es sabut de totis. Seré interessant lavetz de saber quin òrdis an recebut. Es aquò la clau de l’enigma. An recebut l’òrdi de tuar tot lo monde quitament se poden estar un ostatge escapat?

Doncas sèm pas encara a la fin d’aquesta guèrra que s’acabarà pas, com ac podèm pensar, lèu per l’eradicacion deu Hamas e lo retorn deus soldats israelians a casa. De seguir, (per malastre) …