Vaquí un debat qu’a segotit la telaranha e solide los taulèrs d’estanquets per aquesta passa. S’agís d’un grop d’escolans que’s declarèn butats peu hèit qu’una professora aja muishat en cors lo tablèu deu sègle XVII-au Diana e Acteon deu pintre Giuseppe Cesari, que presentava cinc hemnas nudas.

En mès d’aquò, la professora estoc acusada de paraulas racistas, çò qu’es pas encara averat. I avosse pas agut lo murtre d’Arras e lo deu praube Samuel Patty, l’ahar auré pas hèit tan de brut, los autes ensenhaires aurén pas utilizat lor dret de retrèit e lo ministre de l’Educacion seré pas vengut dens l’establiment. Mes efectivament, l’ombra d’aquestes dus dramas plana.

Per çò de la difamacion de la regenta, es pro simple, saberam lèu çò qu’estoc dit e serà reglat. Dinc ara semblaré que l’acùs es meslèu faus. Per contra me pausi questions sus çò que pòt butar o pas.

Daubuns s’esmalissen de çò que la pausicion deus escolans (basada sus la religion musulmana) sia un dangèr per la libertat. Benlèu. Sabi pas.

On se tròba la termièra entre çò de decent e d’indecent?

Cau imaginar que cinc hemnas se passejan per carrèras dens la tenguda de las deu quadre, serén de tira arrestada per la polícia de la Republica. La fòto d’un sèxe mascle es considerada coma desconvenienta, quan l’imatge d’una estatua grèca que muisha la medisha causa ac serà pas.

Jo, de mon costat, èi dejà participat a un encontre naturista o visitat lo vilatge nudista deu Cap d’Agde, e soi pas particularament pudic. Mes cresi que’s possible de respectar la pudor deus autes sense de voler a tota fòrça les butar “per sa libertat pròpia”.

Disi aquò pr’amor que daubuns an paur que la libertat sia en dangèr. Daubrissi doncas lo debat, qu’èi mès de demandas que non pas responsas. Estosse l’imatge en question una fòto realista, seré possible de la mostrar a escolans de 6-au? Lo hèit que sia una pintrura sus tela desinibís lo monde pr’amor qu’es art? E estosse la fòto tanben art? Tot aquò es fòrça relatiu.