Dempuèi la nuèch dels temps de dichas popularas acompanhan los meses de l’annada. Ne’n vaquí d’occitanas, pels dotze meses venents, qu’avèm ausidas en Cevenas nautas. Benlèu que se retròban dins d’autres cantons d’Occitània. Qual sap? Se ne coneissètz, escrivètz al Jornalet! Amb lo rescaufament climatic, anam veire s’aquelas dichas se verifican l’annada 2024.

Genièr:

• Lo primièr de l’An, profita d’un pam.

• Genièr d’aiga chiche, fa lo païsan riche.

Febrièr:

• Per Candelosa (2 de febrièr) se lo solelh fa luquèrna, quaranta jorns ivèrna.

• Aguètz pas paur de l’annada de bissèxt mas d’aquela de davant o d’aquela d’aprèp. (2024 n’es una!)

Març:

• Se Març non marçeja, tot l’an n’a enveja.

• Quand tròna en mars, l’annada es bona.

Abril:

• Abril a trenta jorns, se ploviá trenta-un fariá pas mal a degús.

• En abril, canta lo cocut s’es viu.

Mai:

• Son pas totes florits, los jorns del mes de Mai.

• Mai ne fa mai dins una nuèch que abril en dètz-e-uèch.

Junh:

• Se plòu per Sant Medard (8 de junh), plòu quaranta jorns pus tard.

• Per Sant Barnabe (11 de junh), dalha ton fen.

Julhet:

• Julhet sens auratge, famina al vilatge.

• En julhet cal refrescar, e per Nadal cal caufar!

Agost:

• Al mes d’agost la dormida e los gostarons.

• Al mes d’agost, tota poma pren gost.

Setembre:

• Setembre empòrta los ponts o agota las fonts.

• Agost amadura, setembre culhís.

Octòbre:

• A Sant Luc (18 d’octobre) nèu per truc, A Totsants (1^er de novembre) nèu per camp.

• Quand octòbre pren fin, es Totsants deman matin.

Novembre:

• Quand l’aiga sortís al mes mòrt, sortís totes los meses de l’annada.

• Se l’ivèrn seguís son camin, arriba a la sant Martin (11 de novembre)

Decembre:

• Per Nadal d’un pè de gal, per Carnaval d’un pas de chaval.

• Quand per Nadal solelha, per Pascas brutla ta lenha.

Al sulhet de 2024, vos desiram una crana annada. Que posquèsse vos portar patz, santat, libertat, amor e umor... E coma disiá ma Grand la Bòrnha:

Se sèm pas mai, que siam pas mens!