Un novèl article tematic, aqueste còp lo tractament del son amb de logicials liures. Abans de parlar del tractament informatic cal començar amb la captura del quite son.

Sovent los microfòns integrats als ordenadors bastan pas per crear un contengut de qualitat, cal despensar qualques èuros per melhorar lo resultat. Personalament utilizi un microfòn Fifine a 30 èuros amb un filtre anti POP, per atenuar los sons d’esclatament e los sons plosius coma un P o B inicial dur. Vos conselhi d’apondre aqueste mena de filtre a vòstra crompa, còsta environ 10 èuros coma primièr prètz. N’avètz tanben contra lo bruch del vent. La vidèo que me faguèt causir aqueste microfòn es aquesta: Top 5 microphone PC à moins de 30 èuros

Ara parlem de la reduccion logiciala dels bruches parasites, i a l’interfàcia NoiseTorch. Fonciona aital: s’installa e se junta amb un periferic d’entrada, lo microfòn, e fa venir disponible una sortida son novèla. En clar, dins lo logicial de captura de son qu’utilizatz, vos calrà causir lo microfòn nomenat NoiseTorch que serà lo resultat del vertadièr microfòn netejat dels bruches de fons. Demostracion aquí, anatz a la minuta 6 dirèctament: https://www.youtube.com/watch?v=DzN9rYNeeIU

L’apondon de NoiseTorch val la pena se pensatz d’enregistrar sonque de paraulas d’umans, se volètz far de musica serà benlèu pas una bona idèa de tirar de sons.

Los logicials d’enregistrament de son son nombroses, n’ai causit dos per aqueste article.

• L’enregistrador de son de GNOME, coma la màger part de las aplicacions GNOME l’objectiu es de rendre un servici e es tot. Aquí enregistrar de sons, als format Ogg Vorbis, Opus, FLAC, MP3 e MOV. Una limitacion es que vos permet sonque de causir una font d’entrada, es a dire que podètz pas enregistrar lo son captat pel microfòn e lo son de l’ordenador a l’encòp. Per exemple se vos enregistratz a jogar un jòc, mancarà la pista àudio del jòc.

Per aquò far, podètz utilizar Reco: https://flathub.org/oc/apps/com.github.ryonakano.reco

Possedís d’opcions coma l’enregistrament automatic, lo relambi abans captura, la definicion de la durada maximala.

• S’avètz ja manipulat de fichièrs sons Audacity es benlèu un logicial que coneissètz. En abril de 2021 lo grop Muse Group aqueriguèt l’aplicacion Audacity e comencèt sa transformacion per i apondre de telemetria contra la volontat dels utilizaires. La comunautat venguèt cada còp mens presa en compte dins las decisions. Un moment clau arribèt quand lo grop violèt la licéncia d’utilizacion, se podiá pas mai considerar lo logicial coma vertadièrament liure nimai s’i fisar. Per çò qu’es de las traduccions sabi que l’occitan foguèt tirat, a causa d’un bas nivèl de manteniment imagini. Ara las traduccions se debanan via listas de difusions, valent a dire per corrièl, çò qu’es de mal far...

Mas lo monde del logicial liure es plen d’espèrs. 3 projèctes derivats, estant qu’es un còdi liure es a disposicion, nasquèron en utilizant lo còdi tal coma èra abans l’apondon de la telemetria.

Audacium, Saucedacity e Tenacity s’apèlan. Ara demòra pas qu’actiu Tenacity. Malastrosament la traduccion en occitan es sonque a 12%. Se sabètz escriure occitan lengadocian e qu’avètz lo vocabulari podètz ajudar aquí: https://hosted.weblate.org/projects/tenacity/tenacity/oc/

Per passar vòstres fichièrs àudios d’un format a un autre podètz utilizar lo logicial Sound Converter concebut sonque per realizar aqueste prètzfach.

Ara una pichona virada demest lo monde dels lectors àudio. Las distribucions Linux ofrisson sovent Rhythmbox coma lector per defaut. Aprofièchi d’aqueste article per vos parlar d’alternativas disponiblas en occitan, vertadièrament vòstra causida dependrà de las opcions que vos agrada d’aver o encara de l’estil de l’interfàcia grafica. I a:

• G4Music: https://flathub.org/oc/apps/com.github.neithern.g4music

• Amberol: https://flathub.org/oc/apps/io.bassi.Amberol

• Resonance: https://flathub.org/oc/apps/io.github.nate_xyz.Resonance (lèu en occitan)

Un lector un pauquet a despart es decibel : es concebut pel monde que fan d’entrevistas notadament (jornalistas, estudiants, professionals o cercaires de fenomèns paranormals). Son interfàcia fa venir facil de tornar a un ponch precís en s’ajudant de la representacion grafica del son.

Un autre logicial d’usatge pontual: Audio Sharing. Vos permet de partejar lo son de l’ordenador via lo ret. Valent a dire que quin periferic que siá amb una connexion ret e la possibilitat de legir un flux RTSP pòt venir un nautparlaire. Pòt servir s’avètz pas la possibilitat d’utilizar de periferics Bluetooth per exemple o per vos passar de cables.

Etiquetem! Ear Tag, que l’icòn me fa pensar dirèctament a las vacas de mon enfança en Carcin, es un logicial que permet de modificar las metadonadas dels fichièrs àudio. Se pòt cambiar las informacions d’un biais gropat, l’aisina pòt recuperar las entresenhas via lo servici AcoustID. Es pas encara disponible en occitan, es en cors d’integracion.

Un pichon bònus per terminar aqueste article: Blanket. Aqueste logicial a per tòca d’èsser aviat en rèireplan e d’apondre de bruches a vòstra musica o silenci. Aqueste bruches son: bruch del canton amb lo fòc, bruch de tren, bruch de la vila (se vos manca), bruch blanc (sabètz coma la television analogica sens sinhal), auratge, e encara mai. Permet a d’unes personas d’èsser mai productivas.

 Levat NoiseTorch, que se pòt pas traduire, la lenga es siá ja inclusa siá lèu disponibla. Utilizar un sistèma operatiu en occitan, navigar sus una botiga d’aplicacions en lenga nòstra puèi utilizar un logicial complètament en occitan, es aquò la plenitud lingüistica :)