Se cambia pas, mas se modifica una esquipa que pèrd. E n’avèm ara una de plan polida al cap de França…

• Tant que vira: La pròva es tornarmai balhada qu’a fòrça de virar lo centre cabuça a dreita. En mai, aqueste còp, per adobum, coma un rèire-gost (o un fial a la pata) de sarcozisme!

• Migrants: Es que Darmanin va tornar a la frontièra la Rachida Dati qu’a dos parents que venián d’Africa del Nòrd?

• De polit monde: La nominacion de Rachida Dati a la cultura es una suspresa, mas probable mens que d’unes noms qu’avián corregut per aquel pòste: Clara Chazal o Estefan Bèrn (per metre la cultura en bèrna?)!

• Afars: Lo ministre de l’Injusticiá poirà obrar per que sa collèga de la Cultura siague pas embestiada per lo planh en rason de ”corrupcion e trafic d’influéncia passiu per persona investida d’un mandat electiu public”.

• Trabalh e santat: Una meteissa ministra s’entreva del trabalh e de la santat. Aquò confirma lo diagnostic de l’Enric Salvadòr: ”Lo trabalh, aquò’s la santat!”, mas ajustava: ”Res faire es la servar”… Se pòt doncas pas comptar sus la ministra per prene qualque decision positiva que siá!

• Competéncias: ”Un ministre dels Transpòrts a pas de besonh de saupre menar un avion per èsser competent” (Edith Cresson). Dins lo temps, agèrem un ministre de l’Educacion qu’èra garagista!

• Espòrts e educacion: La meteissa ministra per l’escòla e per l’espòrt. Se pòt esperar un vertadièr desvelopament de l’espòrt a l’escòla?

• Lo grand escart: ”Soi a fet darrèr l’escòla publica,masboti mos pichons a l’escòla privada”. Per jogar al tennís (e èsser ministra de l’Educacion), cal èsser bona gimnasta e capitar lo grand escart…

• Nafradura: Se pòt imaginar que la ministra sortenta de la Santat malcorada de pèrdre son pòste, age trabucat e se siá coronat lo ginolh. Urosament, un representant d’Urgo se trapava apr’aquí per li portar los primièrs secors.

• Òme a tot faire: Lo primièr ministre ditz que contunharà de susvelhar las escòlas, en mai es encargat de la politica de transicion ecologica (sabi pas se s’agís de la menar o se se va contunhar a ne parlar sens res faire). L’ajudarà d’èsser jove: benlèu qu’arribarà de cunhar jornadas de 48 oras entre lo matin e lo ser.

• Agricultura: Es pas amb lo manten de Fesneau a l’agricultura que los païsans van faire fest-noz cada ser! Lo ministre contunharà de los bacinar…

• Brandas: Amb los aigats bèls dins lo nòrd de França, s’avisan que los campasses an pas arrestadas las aigas. Lo govèrn lança una politica de plantacion de las brandas que foguèron fòrabandidas vaquí 70 ans per desvolopar l’agricultura intensiva. Desfaire e refaire es totjorn faire!

• Devenir: ”Mas de qué vau devenir? Soi ministre, sabi res faire!” (Loís de Funès, in La foliá de las grandors)

• Euròpa occitana: Lo Jornaletse regaudís que lo rei novèl de Danemarc siá tanben comte de Monpezat. Amb la familha de Suèda que davala del marescal d’Empèri bearnés Bernadòta, la redaccion se pren a somiar d’una Escandinavia gascona… Se i ajustam la familha anglesa que davala, en linha mai o mens dirècta, de l’Alienòr d’Aquitània, poirem regretar bravament que lo Ravalhac age tuat lo nòste Enric! A! s’Euròpa èra occitana… Atal, seriam pas los subjèctes d’una Occitania plan afrancesada…

Ministerial Roch