Dins de sondatges, de revistas, d’entrevistas a la radiò o al fenestron, suls rets socials se parla dels occitans. Es a se demandar çò qu’es una occitana o un occitan.

Es qu’es una femna o un òme que parla la lenga occitana? Que vòl dire parlar? de longa? De temps en quora? Entre occitans? Amb sos amics o amigas? A la radiò? Al fenestron? A l’escòla? Dins la carrièra? En familha? E la persona: ditz que parla occitan? Ditz que parla patoès? Se parla patoès es occitana?  

Es qu’una femna o un òme que compren l’occitan es un occitan? Que cal entendre per comprene? Es que compren una convèrsa de la vida vidanta? Es que compren un discors teoric, politic, economic? Es que compren un charradís sus un mercat? a la radiò? al fenestron? Es que compren tot? un pauc? Quauques mots?

Es qu’una femna o un òme que legís l’occitan es un occitan? Que cal entendre per legir? Un article de jornal? Una revista francesa amb un article en òc? Una revista occitana? Un poèma? Una novèla? Un libre? En s’ajudant de la revirada francesa? Sens revirada? Amb l’ajuda del diccionari? Sens diccionari? Amb l’ajuda dels diccionaris electronics?

Es qu’una femna o un òme qu’escriu en occitan es un occitan? Que cal entendre per escriure? Un còp a l’asart? De longa? D’articles? de poèmas? de contes? de libronets? de litteratura? Pensa en francés, escriu en occitan? Pensa en occitan, escriu en francés? Pensa en francés-occitan e escriu en occitan? Escriu sus la vida vidanta? sus de domènis especializats? Quin nivèl de lenga emplega? La lenga dels autors reconeguts occitans? Quina plaça fa al francitan?

Es qu’un òme o una femna que mestreja una d’aquelas intradas, las doas, las tres o las quatre (parlar, comprene, legir, escriure) es o se pensa coma un occitan? Es que lo fach d’èsser e de se reconéisser occitan li fa somiar a un passat mitic e/o analisar la situacion politica , economica, culturala, linguistica al nivèl local, regional, national, internacional d’un autre biais? O aquò cambia pas res per el? Es qu’es soncament son identitat o un en mai de son identitat? Es per asorgar un projècte linguistic, cultura? De quina mena?

Es qu’una femna o un òme que fa de cosina “occitana” es un occitan? Es que s’apuèja sus de libres de cosina occitana per aquò far? Es qu’es una recèpta francesa que nomena en occitan? Es qu’una femna o un òme que va al balèti occitan es un occitan? I va un còp per setmana? Un còp per mès, per an? Amb un grop de musica que se ditz occitan? Que o ditz pas mas o pensa? Es qu’una femna o un òme que va a la corridà es un occitan? Es que se pausa la question? O pas? Se se la pausa pas perqué? Es qu’una femna o un òme que jòga al rugbi es un occitan? Jòga o va agachar o susportar de partidas de rugbi? E parièr per fotbòl? Basquet? Andbal? Esquí? Tènnis? Tambornet? Sètz pas parièr perqué?

Demorariá encara un molonàs de demandas a pausar mas, per uèi, ne demorarem aquí? Quora aurem respondut amb aquelas passarem a las seguentas...