Vos ai mancats?  M’estonariá per çò que lo cap redactor qu’es totjorn prèste  a me dire las pensadas pregondas —quand n’i a— dels legeires m’a pas dich res…

Per far cort, veni de passar una setmana entre les mans dels mètges, infirmièras e un persona espitalièr devoat al possible…

Aparentament, aviái lo ti-tafa [lo còr] que fasiá mai tifa que tafa. Après d’examens meticuloses lor decision foguèt de me dire que, fin finala, lo tifa-tafa èra coma lo relòtge del grand qu’ai a l’ostal e que lo tifa e lo tafa emplissián lor ofici e qu’èra pas la pena de me far de misèrias per quicòm que, mes a jorn qualques ans a —e n’aviái besonh!—, tira camin sens problèma per un òme qu’a un pauc mai de setze lustres!

Mas sabètz coma son los mètges… Coma èri pas arribat fièr coma Artaban —n’i a que dison: fièr coma un bar-tabat— e que fa pas seriós de s’estavanir aital, en plen mercat, quitament per se far remarcar, n’an volgut saber un pauc mai e lor farai pas cap de repròchis!

Questiona que quetionaràs, cèrca que cercaràs… n’arribèron a la conclusion, ja corroborada per d’examens anteriors qu’aquò veniá del cap. E son tissoses qu’es pas de creire… e los mercegi, o vos disi…

Es que, una crisi es una crisi e dura generalament pas una eternitat e sabètz totes çò que ditz l’adagi: L’eternitat, aquò’s long subretot cap a la fin!

E ieu, entre los examens,aviái pas res mai a far qu’a ensajar de legir, mas per legir cal un minimum de concentracion e lo pensament de saber que i aviá quicòm que trucava dins mon còrs de “jove vièlh” èra tal qua daissèri tombar la lectura e me contentèri de seguir lo programa en cors sul fenestron —silenciós— de mon vesin de cambra que teniá d’escotaires per me geinar pas.

Justament, mostravan nòstres braves agricultors d’Òut e Garona!!! apielar paletas de  lenha, pneumatics, fems e autras bordilhas davant la prefectura  a Agen per mostrar qu’èran pas contents.

Lo ministre dels truca-colhons aviá declarat urbi et orbi que caliá daissar s’exprimir lo desrei d’aquel mond… e donc pas cap de truca-colhons en vista!

Calriá que los ensenhaires e autres ecologistas empruntèsson los tractors als agricultors per ben mostrar lor desrei al ministre que los daissariá desfilar suau suau…

Ça que la,  pareis que, sonque a Agen, i a agut per 400 000 € de gasta…

Qualqu’un me poiriá dire dire qui va pagar la factura?