Am dejà remercat que los nòstes governants son expèrts en comunicacion. Saben plan hèr créser que son actius e que trabalhan per milhorar lo país, que tròban solucions au problèma de la societat.

Comencèm de comprénguer qu’afichan posturas mès sovent que crean quicòm de bon que serviré a l’ensems deus administrats. Lo darrèr devís de Gabriel Attal a l’Amassada Nacionala qu’ac muisha plan. Frasas beròias per agradar a la dreta de la quau a besonh, mes que vòlon pas díser ren: “hèr respectar l’autoritat a la joenessa”. Una nautat que hascoc trucar de las mans mantuns deputats.

Prenguerèi pas que tres exemples. Lo purmèr veng de Maoré (en francés: Mayotte). Aqueste departament francés coneish una situacion mauaisida pr’amor de la volontat, a la basa, deus franceses de manténguer l’iscla dens la republica, lavetz qu’es una part de las Comòras (Juzur el Qamar en arabe). Me hè totjorn tressautar quan ausissi un jornalista parlar “d’imigracion vengudas de las Comòras vesinas”, lavetz que Maoré ES las Comòras.

Lo problèma doncas veng de çò qu’am una iscla que hè partida de l’Union Europenca e deus sheisau país mès ric deu monde tot a costat d’un deus paises mès paures de la Tèrra. Com tot aquò pòt foncionar? I a una situacion de pas ténguer pr’amor d’una proximitat de dus mondes extrèmes.

La solucion? Lo ministre Darmanin a trobat: rebotar en question lo dret deu sòl. Cercar pas lo problèma a la basa, mes un còp de pintrura, e tot va plan …

Lo dusau es lo hèit qu’am a cada còp mès de violéncias de cap a elegits. De qué veng aquesta situacion? Perdequé lo monde an un tau sentit? Perdequé la hidança de cap aus conses s’es perduda? Soscar ad aquò sembla plan complicat, e la solucion trobada es de durcir las penas per cas d’agression d’un elegit. Precisament au moment quan nos brembam d’un Robèrt Badinter qu’expliquèc que la miaça de la pena a pas nat pes sus lo qu’es a passar l’òsca de la lei.

Lo tresau es solide lo de la venda deu canabís. Creatz una societat inegalitària dambe fòrça rics e fòrça paures e un varat que’s cava cada jorn. Creatz ghettos a l’entorn de granas vilas. Interdisètz una substança que hè 0 mòrt cada an (en comparason dambe l’alcòl e lo tabat que’n hèn 41 000 e 75 000) e aurètz un comèrci que’s desenvoloparà e geinarà los vesins.

Pas de problèma, lo medish ministre va desvolopar e ahortir “accions contra los vendeires” devath las cameras de television. Lo problèma es reglat. Hmmm, sabi pas, lo darrèr còp que soi passat a Bèlafont, un barri coneishut per aquò, un pichon traficaire èra a charrar dambe … un policièr.

Benlèu le crompava quicòm.