Sèm totjorn en cèrca e en recèrca de la vertat vertadièra e vos pòdi dire qu’es pas causa aisida.

• Falsa istòria: Las edicions Privat publican un libre pels joves: L’Occitanie, toute une histoire! Dintrem dins una Lavissariá de l’istòria d’aquela Occitania rapichonida e que ven increada en doblidant lo demai de las tèrras d’Òc (es a dire, de fait, Occitania!)

• Falsa literatura: Las edicions Papillon Rouge s’interessan a la literatura d’Occitania, es a dire solament a la literatura de la Region Occitania. Lor compilacion Mots et merveilles d’Occitanie daissa creire qu’una sola lenga es utilizada per dire, descriure lo país: lo francés. Los autors occitans un còp de mai redusits al silenci.

• Falsa cosina: Es lo meteis problèma per lor libre Recettes retrouvées d’Occitanie ont traparetz pas de bolh-abaissa de Provença o de mica lemosina mas l’ollada catalana! Francament, vos val mai procurar los libres del Vicent Marqués sus las cosinas d’Occitania e dels Païses Catalans!

• E los arbres: Los militants opausats a la dobertura de l’autorota A-69 protèstan per salvagardar los arbres: los arbres contra lo quitran. Alara de qué fan per arrestar las fòrças del desòrdre: copan brancas!

• Falsa ecologia: França foguèt lo segond Estat d’Euròpa d’aver un ministre de l’Environa. 50 ans mai tard, de recuolada en recuolada, se pòt pas dire que lo país age plan avançat sul sicut.

• L’indici falsièr: Engana bèla que la causida de l’indici europèu per mesurar l’espandiment dels pesticidas. S’ai plan comprés, mai se ne met, mai l’indici ven bas! Deu èsser mai complicat qu’aquò, mas del moment que fa plaser a la FNSEA!

• Fals convit: Un jorn, lo govèrn vòl la dissolucion del Joslèvament de la tèrra; un autre, pensa de convidar l’associacion a la discutida sul devenir de l’agricultura.

• Aiga falsièra: Unas aigas mineralas naturalas èran pas tan naturalas qu’aquò. Plan filtradas… Conclusion: Bevètz de vin! (Encara, sens cercar las traças de pesticida dins unes…)

• Lo còst del querosène: Per remandar lèu-lèu l’imam de Banhòls de Cèse en Tunisia, lo faguèron montar de Nimes a París pels aires per lo botar al mai lèu (passi sus las questions juridicas) dins un avion en vòl dirècte cap a Tunís. De segur que, per l’indici carbona, es la linha dirècta e lo camin lo mai cort.

• Compòrtament falsièr: Veire lo RN voler participar als omenatges de Badinter e del grop Manochian fa vertadièrament mal de còr fàcia a-n’ aquela auséncia de vergonha.

• Falsa identitat: Lo president dels Estats-Units s’es mes a gasconejar. A prepaus del Potina, agèt aquela formula: ”Quin hilh de puta!”

• Fals democratas (normal: son republicans): Los sostens de Trump protèstan contra las associacions que butan joves e minoritats a se marcar sus las listas electoralas. Singulièra concepcion de las consultacions popularas!

• Comptes fals: Faire votar un budgècte al Parlament a còps de 49-3 sus la basa d’un indici optimista, puèi, tre l’ivèrn vengut, cambiar las chifras per decrèts governamentals en foncion de l’indici vertadièr sembla plan una brava engana democratica.

• Bona ensalada: La falsa-garba es bona ensalada (E lo fals filet es bona carn). La falsa roqueta ondra las vinhas.

• Quatre (o mai) vertats: Falsetat crenta vertat. La falsetat amaga las vertats. Prenes pas un falsièr coma prefacièr. La falsetat se paga un jorn. Qual-a presica lo fals, un jòrn serà dalhat-da. Te montes pas del fals còl! (paraula de cervesa?) Presicar lo fals per aver lo verai, val tant coma dire la vertat per falsas rasons. Lo falsièr arriba totjorn a faire un fals-pas. Fals-pas fa trabucar.

Falset Roch