La bona novèla es arribada : una relança de l’Estivada se farà jol nom de Nòv’Estivada a Sebazac-Concorés los 26 el -27 de julh venents. Lo collectiu La Gardarem ven de l’anonciar.

La data es plan marcada sul calendièr e cal de segur que lo mai grand nombre de monde se trape en Roèrgue a aquelas datas per butar a un reviscòl fòrt d’aquel moment de rescontre de la cultura e de las arts occitanas.

La Nòv’Estivada deu pas èsser simplament un luòc de consomacion d’espectacles, d’aligòt e de vins de Marcilhac! A de tornar jogar un ròtle dins los rescontres (formals o informals), la multiplicitat dels agaches, la presentacion de projèctes, los escambis… 

La tòca es grandarassa que gaireben tot es a tornar bastir amb lo sòmi fòl que Sebazac vengue per l’occitan çò que Marciac es pel jazz o An-Oriant pel breton.

Aquò vòl dire que plan de monde a de jogar lo jòc :

• los artistas

• los militants

• los responsables associatius

• los mitans politics e institucionals

per que la Nòv’Estivada (e es un autre brave enjòc) siá un festenal de tota Occitania (e pas solament de la Region dita Occitania!) per çò que avèm de besonh de la circulacion dels artistas sus l’ensemble del territòri (e en defòra del territòri).

Òm pòt tanben somiar que los festenals que s’entrevan d’occitan se rescontren, se coordonenen e benlèu mutualizen unas causas, almens una coeréncia de calendièr e unas complementaritats. A cadun de trapar la motivacion bèla de s’ocupar de se mas pas solament : cal gardar a l’esperit que s’òbra per quicòm de plan mai grand que pertòca la preséncia occitana mai fòrta dins la societat. Cal crear una dinamica!

Aquelas doas jornadas devon èsser un tremplin de presentacion, de promocion e de proposicions per rendre mai fòrta la difusion de l’espectacle viu long de totas las sasons, per passar las barrièras dels silencis mediatics, per sosténer las creacions, per caminar amassa per la lenga e la cultura d’Òc.

Per l’ora, l’associacion La Gardarem compta sus las adesions per ajudar a l‘organizacion de l’eveniment e ne faire un forum festiu, ciutadan e solidari.

Vos que sètz anats/anadas mai d’un còp a l’Estivada, vos qu’avètz pas pogut i anar aprèp la mala decision de la Comuna de Rodés, balhatz per l’ora quatre sòus – la proposicion es de 10 € (o plan mai) per tornar trapar aquel grand rendètz-vos estival https://www.helloasso.com/associations/la-gardarem

Aprèp, sabèm plan que gardar es una bona causa, mas cal aver pel cap l’idèia de desvolopar, d’amplificar e de tornar inventar. L’avenir de la Nov’Estivada nos concernís totas e totes ! Cal destibar lo devenir de la Nov’Estivada!

Estivadièr Roch