Dempuèi qu’Emmanuel Macron a evocat la possibilitat de mandar tropas en Ucraïna, lo ton generau a plan cambiat dens los mèdias. Sabi pas s’atz remercat, mes s’agís d’un brave cambiament d’escenari qu’èra pas atenut.

Quitament s’uns ministres, tra l’endeman, an retropedalat en tot díser que s’agissèva pas que de “conselhèrs tecnics”, lo president a confirmat que calèva considerar cada opcion.

E aquiu, se vedoc còp sec aparéisher punts de vista diferents de çò que sèm acostumats de véser o d’ausir suus grans mèdias franceses. Tres exemples:

Natacha Polony, redactritz en cap deu magazine Marianne, cita un article deu New York Times deu 25 de heurèr qu’explica clarament lo ròtle deus USA dempuèi annadas (implantacion de basas secrètas en Ucraïna e formacion deus servicis secrets ucraïneses a l’espionatge de Russia, volontat au congrès de l’OTAN en 2008 contra lo vejaire de Nicolas Sarkozy e Angela Merkel d’integrar Georgia e Ucraïna per atutar Russia dens sas termièras) per hèr comprénguer que la version “i a pas qu’un sol responsable” es una engana.

De son costat, Pierre Lellouche, ancian president de l’amassada parlementària de l’OTAN e deputat, conda quicòm de desconegut: en seteme de 2021, sia 5 meses abans la debuta de l’invasion, Vladimir Potín avèva perpausat un plan de patz que los Americans avèvan getat a las lordèras e que l’armada ucraïniana amassava tropas per envasir lo Donbàs.

Fabien Roussel, purmèr secretari deu Partit Comunista, après son entrevista dambe Emmanuel Macron, revelèc que lo poder rus perpausava un cessatz-lo-huec que los Occidentaus refusavan.

En un mot, semblaré que lo vent aja virat. Aquestas frasas èran pas pensablas abans, quan una sola istòria èra permesa suus mèdias, l’escenari hollywoodian deus Marrits e deus Braves.

Mes la propaganda es pas encara acabada. Lo 10 de març au jornau de ueit oras de France 2, i avoc un reportatge sus manòbras militaras de mantuns paises de l’OTAN en Escandinavia (dinc a Finlanda au costat de la frontièra russa) devath lo títou: Miaça russa (!).

Se pòt imaginar aisidament que la television russa aja muishat lo medish reportatge dambe lo títou: Miaça de l’OTAN. Solide que los imatges deus batèus de desbarcament occidentaus qu’arribavan sus una platja, dambe los comentaris que cau, èra pro per espaurir lo public rus suu dangièr que pòt representar l’aligança atlantica.

Mes vos pòdi rassegurar: patissèm de la medisha propaganda tanben. Enfin, benlèu que va cambiar…