Opinion
La doçor de la lait d’amètlas…
Tèxte legit
Vaca que ritz: Per se ganhar mercats angleses e vegan, fa ja un an que la Vaca que ritz prepausa un formatge a basa de lait d’amètlas. Cresi que, per un còp, la vaca a trapada una bona rason de rire… (o de plorar?)
De l’art de plombar: Lo Blanquer capitèt de destructurar l’organizacion pedagogica dels licèus (e l’ensenhament de l’occitan, tant qu’a i èstre). Amb Attal, s’es passat a un estadi novèl: amb la creacion de grops de nivèl o de besonh, es la destructuracion de l’organizacion pedagogica dels collègis que se met en plaça. E vos parli pas de las escòlas primàrias que vòlon uniformizar!
La granda paur: Aprèp l’acòrdi sus l’estatut de Corsega (que demòra de confirmar e es pas ganhat), lo Tiron encadenat i va de son article sul risc de demantibulacion de França. Fa temps que l’aucèl a doblidat que l’un de sos jornalistas pausèt la question de cossí èsser breton…
Clartat: Urnas de veire, bulletin de botar sens envelòpa… Las eleccions en Russia se fan dins la clartat absoluda.
Dobertura: Lo primièr ministre gallés es d’origina zambiana; lo primièr ministre anglés es d’origina indiana; lo primièr ministre escocés es d’origina paquistanesa; lo primièr ministre irlandés es d’origina indiana; los ministres franceses son majoritàriament de la region parisenca.
Lo retorn: Carles Puigdemont candidat a la presidéncia de la Generalitat. Es un testimòni d’un episòdi istoric fòrt o un òme portaire d’un espèr renovelat? De veire…
Retorn: Los aucèls migrators tornan en Euròpa una setmana mai d’ora que dins las annadas 1980. Se pòt calcular atal lo moment ont tornaràn abans d’èsser partits!
Dodò: Al Museum d’istòria naturala de París, an reconstituit un coble de l’aucèl desaparegut de l’illa Maurici. An pas degut dormir de tròp per capitar l’afar!
Aiga e gòlf: A Vilanova de la Raò, reciclada o non, l’aiga demòra d’aiga e i a probable un melhor usatge de ne’n faire que d’asagar un gòlf…
Estiu: Ongan, se passèt a l’ora d’estiu la nuèit de Pascas, mas la calorassa èra ja arribada (a titol preventiu?)
Los comptes: Dins un rapòrt de 725 paginas, la Cort dels Comptes afortís que lo compte es pas bon entre las promessas e los engatjaments ecologics del govèrn francés e las realitats de las mesuras presas (o pas) contra lo rescalfament climatic.
Marcha en rè: Euròpa reven sus la necessitat de la rotacion de las culturas, practica millenària per la vida de las tèrras agricòlas e ditz atal òc a las monoculturas e a la necessitat d’ajudas quimicas!
Ramèl d’oliu: Lo ramèl d’oliu es simbòl de patz, mas ara que pòdon las colombas fàcia als drònes, als missiles e autres bombardièrs?
Ametlon Roch
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
En fèit aperar un hromatge La Vache Qui rit, qu'ei dejà un mensonge : las vacas que ronan quand son hèra contentas (un drin com los gats) e la loa expleitacion peu sistèma de l'eslhevatge tà har hromatge ne'us ne dèu pas deishar l'ocasion sovent... Qu'ei ua estrategia marketing : Boursin qu'a tanben hèit la soa version vegana dab a puish près lo medish packaging que per la version dab lèit de vacas.
... Mes ara que compreni la galejada, mercés!
Après si trobatz qu'ei ua bona causa de redusir las ajudas quimicas dens l'agricultura, hèra de las plantas qui hèm possar uèi que son consomadas peus animaus qui consomam... Suprimir o redusir los produits animaus dens la nosta alimentacion, qu'ei donc tanben redusir l'utilisacion de produits fitosanitaris.
Sinon que m'agrada aqueste concèpt de har bracas umoristicas! Tà jo qui n'espii pas guaire l'actualitat que'm permet de conéisher causas qui aví mancadas!
Que vau continuar de léger aquestes articles e de romegar quand i a galejadas neo-carnistas dehens... Mes que m'agrada de romegar sus aquò.
Cap de problèma, mas aurián degut sonar Lo formatge novèl : L’Amètla que ritz o quicòm atal !
Quau ei lo vòste problèma dab la lèit d'amètla?
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari