Er aranés a estat notícia recentament damb eth debat en Congrès d’ua Proposicion non de Lei deth grop republican, que se limite a demanar “ua assignacion de hons estructuraus entar Institut d’Estudis Aranesi – Acadèmia Aranesa dera Lengua”. Ua politica qu’er Estat ven de complir damb era transferéncia de 30 000 èuros annaus entara acadèmia pendent es darrèri exercicis. Per tant, aguesta propòsta non demane mès recorsi entar aranés, coma s’a repetit de forma imprecisa.

Ath delà, er aranés non se defen sonque damb recorsi entar institut, en tot obviar era responsabilitat des administracions publiques encomanades entara politica lingüistica, ei a díder, eth Conselh Generau d’Aran e era Generalitat, ena part qu’aguesta li tòque entath finançament dera matèria.

Per açò, d’ençà deth grop socialista, auem presentat e defenut ua esmenda entà incorporar eth besonh de concertar aguesta politica de consens, pr’amor qu’entenem qu’era promocion dera lengua s’a de hèr d’ençà dera unitat d’accion e ua volentat de coesion. Eth grop republican l’a refusada.

Era sindica Maria Vergés a reiterat fòrça viatges, sustot enes sues compareishences en Parlament, eth besonh d’incrementar eth finançament dera promocion lingüistica dauant dera situacion delicada que viu er aranés, en marc dera Lei der occitan, aranés en Aran, aprovada en 2010, pendenta encara de desvolopar de forma integrau, coma rebrembè ena mia intervencion.

Aguesta demana ei incorporada tanben en ua resolucion politica qu’eth PSC a aprovat en sòn darrèr Congrès Nacionau. Hèts subergessents qu’eth delegat territoriau d’ERC en Aran desbrembe de forma interessada en sòn darrèr article.

ERC a agut responsabilitats de govèrn enquia ara ena Generalitat, pendent es darrèri ans, e es mancances ena defensa der aranés son pro notòries. Dilhèu per açò, per rasons de mala consciéncia, a presentat aguesta proposicion, ara quau s’a somat eth PP, coneishut pera sua animadversion ara diversitat lingüistica, dauant dera politica deth govèrn de coalicion de PSOE e Sumar, qu’a dotat de recorsi ara acadèmia e a prebotjat er usatge des diuèrses lengües en Congrès.