Es pas aisit de demorar zen (amai, valgue mai èsser zen que zinzin) fàcia als pichons problèmas de la vida vidanta coma per las questions fondamentalas sus l’anar del monde. Vaquí unes escapolons d’unas bonas rasons de se botar en colèra e de s’embufar:

• Diluns de Pascas: E los super e ipermercats d’anónciar amb d’afichas bèlas que serián dobèrts del matin al ser pel diluns de Pascas! La nocion de jorns caumats desapareis: lo diluns de Pascas es fait per manjar la meleta amb los amics e los collègas, pas per trabalhar!

• Calendièr occitan: La data de l’Amassada generala de l’IEO deuriá èsser un moment important de l’annada occitanista. Es pas lo cas ongan, vist que se debanarà los 4 e 5 de mai a Nimes, del temps que l’IEO de Cantal festejarà sos 50 ans e que lo monde de Gasconha e al-delà prendràn part a La Passem. Un sòmi: agir amassa pel país en plaça de tirar cadun-a de son costat!

• Salvatz la data: De mai en mai, sus las afichas de manifestacions en francés (e lèu: en occitan?), se vei la mencion: Save the date. Sabái pas que caliá èsser anglés per èsser punctual!

• En lenga locala: Per rescontrar lo Raoni, lo Macron diguèt unes mots dins una lenga d’Amazonia, lo kayopo. Li es pas encara vengut a l’idèia dins sos desplaçaments en França de saludar lo monde en alsacian, en arpitan, en basc, en breton, en catalan, en còrse, en flamenc, en lorrenc o en occitan,…

• Caçajòias: Es important per un esportiu de prene part als Jòcs olimpics e de rescontrar d’autres atlètas de la planeta. La competicion de fòbal es dobèrta als mens de 23 ans mai un nombre pichon de mai vièlhs. En França, se canta l’importància dels jòcs de París per l’afirmacion de las valors de las practicas nacionalas. Unes qu’en pas brica comprés son los clubs de fòbal que vòlon pas liberar lors jogaires per aquela competicion que siague los clubs franceses o las esquipas estrangièiras qu’an jogaires tricolòrs. Tristum!

• Antiracisme: Se joguèt l’autre còp una partida internacionala Espanha-Brasil per denonciar lo racisme d’unes espectators cap a un jogaire brasilenc del Real. Los sostens an plan comprés (al revèrs): la setmana d’apuèi, doas partidas s’arrestèron en rason de las insultas racistas que venián del public . La LFP faguèt jogar las partidas de la dimenjada de Pascas amb la marca suls malhòts: Stop au racisme, mas granda coma un sagèl postal!

• Marselha: Coma occitans, sèm sostens segurs de l’OM. Aquò los oblija pas de pèrdre regularament contra lo PSG!

• A beure: Lo vin es tornat la primièra beguda estimada dels franceses. Solament, es dins l’òrdre: blanc, rosat, roge! Victòria en trompa-l’uèlh! Aicí, en Lengadòc, quand disèm: ”Anam beure de vin!”,s’agís de roge! Aprèp, torni explicar l’inutilitat possibla de beure de rosat dins la mesura ont tenèm globuls roges vist que bevèm vin roge e globuls blancs vist que bevèm vin blanc. Coma avèm pas de globuls rosats, vesi pas la necessitat de beure de rosat! Çaquela, lo poèma ditz: ”Minhona, anem véser a la cava, se la cantina de rosat qu’avèm destapada de matin, a gardat tot son flairum e son passalís!”

• Pneumatics: E vos dirai pas bona annada. Unas ròdas de camion de Goodyear esclatavan. Pendent d’ans, l’entrepresa menèt una campanha mediatica per esvitar de parlar de la question e explicava als accidentats que probablament avián jos-gonflat o tala autra rason en passant jos silenci lo nombre d’incidents e d’accidents advenguts. De fait, i aviá un problèma de concepcion…

• Colerà: Anem, servís a res de te botar en colèra! Te val mai legir la revirada en lenga nòstra que faguèt l’Ives Roqueta del libre de Josèp Deltelh: Colerà.

Coleric Roch