Los paures ases, bravas bèstias, son sentits coma bravament piòts (l’òm se sovent qu’En Peire d’Aragon diguèt que Trencavèl se rendriá quand los ases volarián) alara que son animals valents, caparruts e intelligents. Doncas, demòra a la gent sensada lo ròtle vertadièr de proclamar e denonciar unas asenadas que son exemples bèls de la bestiesa umana.

• A l’ostal: La ministra dels Espòrts (un cort temps ministra de l’Educacion) a proposat que del temps dels Jòcs Olimpics los SDF (Sens Domicili Fixe) tornèssen a… lor ostal… Benlèu que sap pas que, se son per carrièras, es justament per çò qu’an pas d’ostal!

• Ecologia macronista: 400 milions de mens sul budgècte del ministèri de l’ecologia, un miliard de mens sus la prima per la renovacion de las abitacions: an trapat un biais segur de faire d’estalvis de moneda. Al prètz de quant de despensas deman per l’ecologia e per arrestar lo rescalfament climatic?

• La votz subrenaturala: Lo conse d’Agde s’es fait enganar per una femna que vesiá dins l’avenir (lo seun a ela e a sa familha, mai que mai) e que li balhèt òrdres mercé una votz subrenaturala qu’èra pas mai que sa practica de ventriloquia. (Pensatz qu’un-a occitanista ventrilòc-a nos poiriá salvar?)

• Fiertat: Al congrès de la FNSEA, se glorifiquèron d’aver lo ministèri de l’Agricultura que respondiá a sos òrdres. L’avenir païsan es mal barrat.

• Peis d’abril: Un site catalan anoncièt la signatura cò dels Dragons d’un avant en provenéncia de Polinesia. Son nom? Jo Vullollada!

• Cançon: Per la cançon de dobertura dels Jòcs Olimpics, cal de segur una votz fòrta que restontigue sus tota la planeta. Francament, vesi pas perqué s’acontentar de la votz aguda e leugièra d’un(a) piaf (aucelon en argòt francimand!)!

• Contradiccion: Creson e dison que lo francés es una lenga universala, portaira dels dreits de l’òme, de la libertat, de l’egalitat e de la fraternitat e vòlon pas ausir la Marselhesa cantada per qualqu’una venguda d’endacòm mai que l’exagòne! Lor universal es plan limitat.

• Tabac: Lo tabagisme es encausa de plan de problèmas de santat. Per combatre lo dangièr, vaquí que s’aplica una mesura d’armonizacion europèa per arrestar aquela malparada. Se vas a l’estrangièr, en plaça de tornar amb una cartocha (10 paquets; 200 cigarretas) per persona, poiràs tornar amb uèit cartochas! E aquò permetrà d’esvitar lo còp de fusilh dels preses del tabac en França e ajudarà a la barradura de las botigas de buralistas (que seràn pas salvats pel fait de poder vendre cartochas… per la caça!). Aquela mesura es una pròva de mai que son los sòuses que ba menon tot!

• Paura Marisa: Fa gaire vos parlavi de la reconeissença que la mòrt portava als escrivans occitans. La meteissa causa ven de se passar per l’escrivana Marisa Condé. Privada de sa lenga (lo creòle) e de l’istòria de son pòble par sa maire regenta de l’escòla francesa (per venir regent, te caliá passar per l’Escòla Normala per ta normalizacion francesa), escriguèt fòrça sus la question de las originas e sus la colonizacion. S’afirmava independentista guadelopeana. Un còp mòrta, premsa e ràdiòs parisencas de dire qu’èra pas pro reconeguda en França e lo president Macron i anèt de son elògi!

Saumet Roch