Diga! Sèm dins un mond d’escambarlats. Vos l’acòrde, sèm pas pus davant la causida brosenta de renegar sa fe o de montar sus lo lenhièr, de causir Navarra o ben una messa e París mas fasèm totes lo grand escart mai bèl que la mirgueta en tutú de l’opèra: a se deslogar l’entre-cambas e s’escrapochinar quicòm!

L’exemple ven d’ennaut, “fasètz çò que dise mas pas çò que fau!”, de l’educacion, de la justícia o de la cultura mas “auretz pas un sòu de mai bèl contrari!”; de la promocion de la diversitat culturala e de l’uniformizacion dins la pensada unenca, “la sola, la bona, la vertadièira, la nòstra!”; dau “fumatz pas mas crompatz cigarretas per remontar lo deficit de l’Estat”; sens mancar aquel que nos pertòca particularament lo famós “aparatz la diversitat lingüistica e escanatz las lengas dau territòri vòstre…” Tota semblança o similitud amb França seriá pas qu’un còp d’azard malastrós Bautesar! Tartufa e farisèus son plan vius.

E tus, onte ne siás? Veitura electrica tot en demandant l’abandon total dau nuclear; bicicleta dins lo cada jorn, crompas localas en circuit cort e viatge de fin de setmana per brunchar (ieu dise matinar) a London, Viena o Dublin; rocafòrt en fin de repais mas ardadas de lops sus Larzac per faire brossar lo lach de las fedas; òrt organic en permacultura e piscinassa davant la villà encenchada per de parets de 2,5m de naut que copan l’aureta d’estiu; veganista vestit de sintetic aparaire dau campèstre a la sauça vilandresa…

Lo balèti de las faussas cadaulas fai pas que de començar.

Vòls que te diga? E ara t’enebisson de podar e recurar los randals e las cansas per aparar l’aucelilha e t’obligan a desbartassar pro luònh a l’entorn de l’ostau per te faire viure dins un ermàs... Es Con que vira e Colha que trabuca que farguèron aquela lei. Non?

Enfin, es çò que ne dise ieu…

La guinhada de l’IEO34. E, rau!