• Defensa dels animals: La ministra canadiana de las Pèscas desira que se desvelòpe la caça de las fòcas. Atal, lo monde se’n poiràn aitant regalar que dels ligombaus. Lor i mancava qu’aquò a aquelas pauras bèstias aprèp la fonta de las glaças en rason del rescalfament climatic.

• Pas lenga d’idèia: Dins una emission vièlha, lo Marcèl Panhòl explicava que lo provençal èra bon per exprimir de sentiments e pas d’idèias. La version d’aquesta idéia francesa de las lengas, ai coma lo sentiment que foguèssse pas de la bonas!

• Lenga de trabalh: Lo grand centre de la francofonia de Villers-Cotterets recruta un director per «L’Aligança per las tecnologias de las lengas” que, tot naturalament, sa lenga de trabalh serà: l’anglés! Sabi pas s’es confòrme a l’article 2 de la Constitucion francesa…

• La guèrra de la k: A Taïti, son a discutir per saupre se cal integrar la letra k dins l’alfabet del taïtian. Los unis dison qu’es pas una letra locala, los autres que la letra existissiá mas qu’a desaparegut… Se lor i poiriá mandar linguistas e filològ-a-s occitan-a-s per resòlvre la question… Pacificament, aquò va de se!

• Badaires: Trapi qu’unis articles de nòstre Jornalet ben-aimat son un pauc badaires rapòrt a las possibilitats de l’Intelligéncia Artificiala. Quand aquesta IA capitarà d’utilizar un occitan blos, a de qué servirà se degun-a pus parla la lenga dins la vida vidanta? Volèm servar una lenga de chuc e de muc e non pas virar al paraulís d’algoritmes…

• Intelligéncia umana: Un responsable dels servicis secrets israelians jurava que pels mejans informatics de la famosa IA (I-an!), mas aviá doblidat una sola causa: es d’aprene l’arabi a sa besonha per comprene los escambis e los projèctes dels opausants .

• Fusion  Lo Francis Lalanne e lo Dieudonné parlan de faire tièra comuna per las europèas. Nom de la tièra: France Libre! Lo debacte continental va prene d’ample…

• Retiradas: La SNCF propòsa a sos emplegats un sistèma de fin de carrièra plan melhor que lo biais de retirada passat amb tant de dificultats al Parlament!. Arriba que la mobilizacion pague…

• Unifòrmes franceses: Las comunas que se son lançadas dins la marrida idèia d’un unifòrme pels escolans s’avisan que va costar plan car e que la solucion es de crompar a l’estrangièr! Encara una bona mesura per l’emplec local! Un polit exemple de circuit cort a presentar dins totas las escòlas, non…?

• Aigas: Mercé a las espròvas en aiga liura que se tendràn pels Jòcs olimpics dins Seina, se sauprà se las aigas del flume tenon (o pas) vertuts terapeuticas o epidemicas!

• Davalada: Fàcia al PSG, lo Barça èra pas bric dins l’obligacion de copiar, revertar, semblar, desgaunhar l’OM!

• Vilania: Vos cal pas comptar sus ieu per sautar a la pèrga. Ja qu’al primièr estagi, ai lo vertigi quand gaiti la carrièra! Alara, 6,24 mètres…

Inartificial Roch