Aquesta version sortida al mes d’abril es una version longa presa en carga, valent a dire que i aurà de mesas a jorn e actualizacions de seguretat pendent 5 ans. E 5 ans addicionals per la seguretat pels abonats a Ubuntu Pro.

Qué de nòu?

Un dels primièrs cambiaments aportats es l’installador novèl desvelopat en Flutter, lengatge de Google. Graficament es mai d’actualitat mas son desvelopament tardiu faguèt que’ls traductors aguèron mens de temps per traduire e provar las traduccions. Tocant l’occitan, de tròces son encara en anglés pendent l’installacion. Per nuançar aquò, l’installador es compausat d’ecrans qu’òm vei pas qu’un còp durant 15 minutas, mas una plenitud lingüistica auriá pogut èsser melhora sus aqueste ponch. L’installador prepausa d’installar lo sistèma operatiu o de lançar una session temporària. Segon la varianta d’Ubuntu que causissètz poiretz aver la session dins la lenga triada. Pendent mos ensages amb Ubuntu brut fonciona ben la presa en carga de la lenga mentre qu’amb Ubuntu MATE la session demòra en anglés. L’anomalia èra coneguda pendent la fasa de pròva e corregida tardivament, benlèu que per aquò la còla d’Ubuntu MATE agèron pas lo temps d’incorporar la correccion a la version finala.
Segond cambiament: minimal es encara mai minimal. Tirèron de l’installacion minimala lo lector àudio Rythmbox, la seguida burotica LibreOffice, lo logicial de corrièls Thunderbird, lo gestionari d’agenda Calendar e lo pauc de jòcs qu’Ubuntu aviá. Se trapan ça que la dins l’installacion “espandida”, e podètz totjorn installar los logicials que volètz un còp l’installacion acabada quin tipe d’installacion ajatz causit.

La logitèca es ara gerida pel logicial “App Center” de Canonical. Òm i pòt installar de logicials triats en categorias, que siá al format .deb de totjorn en çò d’Ubuntu o en snap. Mas pels .deb la logitèca permet sonque de metre a jorn los logicials, es pas capable d’utilizar un fichièr .deb tèrç per realizar l’installacion.

Division de l’ecran dinamica, amb Ubuntu 24.04 es mai simple de conhar una fenèstra a l’ecran amb una division en 4 zònas.

Lo partiment de senhal Wi-Fi ven tanben mai facil; dirèctament als Paramètres > panèl WiFi trobaretz una opcion per generar un còdi QR de numerizar sul periferic ont volètz apondre una connexion Wi-Fi.

Mai tecnic, aqueste version es motorizada pel nuclèu 6.8 de Linux. Los emplegats de Canonical faguèron de melhoraments costat gestion de la memòria çò que fa venir l’experiéncia del vidèo jòc encara melhora amb Ubuntu.

La version bruta d’Ubuntu es acompanhada de GNOME 46: correccions d’avarias, melhoras performanças, traduccions mai avançadas. Un pauc mai en detalhs:
Lo gestionari de fichièrs ofrís la recèrca demest lo dossièr actual o una recèrca globala en un clic, melhora performança, las operacions en cors s’afichan enbàs a man esquèrra, se pòt modificar l’emplaçament actual en doble clicant la barra d’adreça. La gestion dels paramètres sistèma via Paramètres fa venir mai aisit l’accion de lançar en brancant una clau USB, en inserissent un DVD, un CD-ROM, una carta SD etc. Lo panèl Mirga e Pavat tactil permet ara de configurar cossí realizar un clic drech amb lo pavat tactil, d’indicar se cal desactivar aqueste pavat en picant al clavièr. GNOME Online Account prepausa d’apondre un compte de tipe WebDAV e Microsoft Personnal account, per trapar vòstres fichièrs dirèctament dins lo gestionari de fichièrs.

Las distribucions Linux son l’unica possibilitat d’utilizar l’informatica dins nòstra lenga per ara, los autres sistèmas operatius apondrián benlèu la lenga s’existiá una obligacion legala o una pression dels crompaires.

Vejatz aquí per las explicacions per ensajar Ubuntu dins una maquina virtuala.